Þrátt fyrir að geta kosið eftir sinni sannfæringu hafa dómararnir yfirleitt kosið eftir línum þess forseta sem að skipaði þá. Repúblikanar kjósa íhaldssamt og Demókratar frjálslynt. 

Fram að þessu voru fimm dómarar skipaðir af Repúblikana og fjórir af Demókrata. Það verður engin breyting þar á en Anthony Kennedy, sá sem lætur nú af störfum, var tilnefndur af Repúblikana. Hann hefur hins vegar af og til kosið á frjálslyndum línum og þá með Demókrötum. Hann kaus til að mynda með hjónabandi samkynhneigðra þegar það var samþykkt árið 2015 og kom í veg fyrir að takmarkanir yrðu settar á fóstureyðingar.

Nú er hins vegar hætta á að frjálslyndari sjónarmið muni eiga erfitt uppdráttar ef tilnefning Trumps gengur í gegn. Flestir telja Kavanaugh vera mikinn íhaldsmann og hann hefur til að mynda verið opinberlega andvígur fóstureyðingum.

Hæstiréttur Bandaríkjanna er frekar pólitískur og tekur afstöðu í mikilvægum málum. Í gegnum tíðina hefur hann til dæmis átt lokaorð varðandi fóstureyðingar, dauðarefsingar, byssueign, aðskilnað kynþátta og hjónaband samkynhneigðra. Það er því augljóst að val Trumps getur haft gífurleg áhrif þegar litið er til framtíðar.

Pétur Marteinn Urbancic Tómasson er vikulegur gestur í Núllinu á miðvikudögum þar sem að hann fer yfir pólitísk mál hverrar stundar. Hægt er að hlusta á innslagið í heild sinni í spilaranum hér að ofan.