Athugið þessi frétt er meira en 5 ára gömul.

Hrósar Hildi Erlu fyrir kjark og áræði

Mynd með færslu
 Mynd: Anton Brink - Ruv.is

Hrósar Hildi Erlu fyrir kjark og áræði

21.10.2017 - 17:10
Hörður J. Oddfríðarson, formaður Sundsambands Íslands, þakkar sundkonunni Hildi Erlu Gísladóttur fyrir að koma fram með sögu sína. Hún greindi frá því í viðtali við Fréttablaðið í morgun að þjálfara hennar hjá Sundfélagi Hafnarfjarðar hefði tekist að brjóta hana gjörsamlega niður með áreitni og kynferðislegu ofbeldi. Hörður viðurkennir að sundsambandið hefði getað brugðist við með meira afgerandi hætti þegar annað mál tengt sama þjálfara kom inn á borð sambandsins. „Sú saga er til að læra af.“

Í viðtalinu kom fram að brotin hefðu hafist fyrst þegar Hildur var aðeins sextán ára gömul. Hún hefði hefði fundið kjarkinn til að segja frá brotum mannsins þar sem hún var fullviss um að áreitnin myndi að lokum enda með nauðgun. „Hann gerði allt nema að nauðga mér,“ segir Hildur í viðtalinu.

Sundþjálfarinn er ekki nafngreindur í viðtali Fréttablaðsins. Honum var vikið frá störfum í maí 2008 og máli hans vísað til barnaverndaryfirvalda en í frétt DV var meðal annars fullyrt að harðar deilur væru innan stjórnar sundfélagsins um að hluti stjórnarmanna hefði hlotið vitneskju um „ósæmilega hegðun þjálfarans án þess að aðhafast frekar.“ 

Hörður J. Oddfríðarson, formaður SSÍ, segir í yfirlýsingu til fjölmiðla að Sundsamband Íslands hafi verið upplýst um málið þegar það kom upp og hafi í framhaldinu sent tilkynnningu um hann til LEN, Evrópska sundsambandsins, og FINA, Alþjóðasundsambandsins. „Í þau skipti sem haft hefur verið samband við SSÍ með fyrirspurnir um þjálfarann, hefur alltaf verið upplýst um þetta tiltekna mál og viðkomandi bent á að ræða beint við Sundfélag Hafnarfjarðar til að fá upplýsingar frá fyrstu hendi,“ segir í yfirlýsingu Harðar.

Hildur segir í viðtalinu að hún hafi fyrst ákveðið að kæra manninn ekki en síðan lagt fram kæru árið 2013. Þá fannst þjálfarinn ekki. „Hann fór strax úr landi eftir að hann var rekinn og byrjaði að þjálfa lið í Suður-Afríku. Mér fannst ótrúlega vont að vita af honum að þjálfa ungmenni. Þetta er maður sem gerir þetta örugglega ekki bara einu sinni og væntanlega var hann ekki að gera þetta í fyrsta skipti,“ er haft eftir Hildi í viðtalinu.

Yfirlýsingu Harðar er hægt að lesa hér:

 

Fyrir hönd sundhreyfingarinnar á Íslandi þakka ég Hildi Erlu Gísladóttur fyrir að koma fram með sögu sína í Fréttablaðinu í dag.

Það lýsir kjarki og áræði, en það jafnframt hvetur okkur hin til frekari verka til að uppræta það mein sem kynbundið ofbeldi er.

Sundsamband Íslands brást við þegar mál tengd viðkomandi sundþjálfara kom fyrst upp á sínum tíma, með því að upplýsa félagið, sem var hans vinnuveitandi, um málið.  Í ljósi sögunnar má segja að Sundsamband Íslands hefði getað brugðist við með meira afgerandi hætti. Sú saga er til að læra af.

Þegar hins vegar mál Hildar Erlu kom upp á yfirborðið árið 2008, þá brást Sundfélag Hafnarfjarðar við með því að segja þjálfaranum upp störfum samstundis og styðja Hildi Erlu í því ferli sem þá fór í gang. Jafnframt upplýsti félagið SSÍ um málin og í framhaldi af því sendi SSÍ tilkynningu um hann til LEN, Evrópska sundsambandsins og FINA, Alþjóðasundsambandsins. Í þau skipti sem haft hefur verið samband við SSÍ með fyrirspurnir um þjálfarann, hefur alltaf verið upplýst um þetta tiltekna mál og viðkomandi bent á að ræða beint við Sundfélag Hafnarfjarðar til að fá upplýsingar frá fyrstu hendi.

Það er sundhreyfingunni á Íslandi mjög mikilvægt að traust ríki milli iðkennda, þjálfara, félaga og sambands. Öll ofbeldismál, hverju nafni sem þau nefnast, eru brot á því trausti.  Slík brot koma í veg fyrir að einstaklingar njóti sín og íþróttarinnar. Slík brot koma í veg fyrir að einstaklingar fari með heilbrigða lífsreynslu út í lífið og slík brot koma í veg fyrir að heilbrigð íþrótt vaxi og dafni á eðlilegan hátt. Það er því mikilvægt að bregðast við án tafar og herða á þeirri vinnu sem þegar er farin í gang til að koma í veg fyrir að slík brot eigi sér stað.

Stjórn Sundsambands Íslands samþykkti á fundi sínum þann 31. ágúst síðastliðinn að setja í gang fræðslu fyrir félög og sundfólk, um einelti, ofbeldi af öllu tagi og geðheilsu. Markmiðið er að sundfólk og félög verði upplýst um hvað er eðlilegt og hvað ekki, hvaða viðbrögð eru viðeigandi og svo framvegis. Efni frá ÍSÍ verður notað og fengnir utanaðkomandi aðilar og fagfólk til verka.

Sundsamband Íslands hvetur þá sem telja að á sér hafi verið brotið innan hreyfingarinnar að hafa samband við undirritaðan eða skrifstofu SSÍ. SSÍ mun greiða leið þeirra að viðeigandi þjónustu fagaðila.

Í lokin þakka ég Hildi Erlu aftur fyrir að segja sögu sína og geri mér vonir um að hún verði til þess að skapa heilbrigðara (sund)samfélag.