Mynd: Sif Hauksdóttir - Breiðdalshreppur
Athugið þessi frétt er meira en 7 ára gömul.
Hreppurinn blankur svo íbúar tóku sig til
„Það þarf ekki annað eina rödd til að boltinn fari að rúlla. Þannig að við horfum til sumarsins með gleði,“ segir Sif Hauksdóttir, verkefnastjóri hjá Breiðdalshreppi.
Íbúum á Breiðdalsvík tókst á skömmum tíma að safna fyrir endurbótum á sundlaug staðarins sem hafði staðið ónotuð í um tvö ár. Börnum á staðnum hefur verið ekið til Stöðvarfjarðar í sundkennslu bæði að vori og hausti en nú geta þau fengið sundkennslu í heimabyggð.
Engir peningar til - eða hvað?
Þegar ljóst varð að fara þyrfti í dýrar endurbætur á lauginni og skipta um dúk á henni ákvað þáverandi sveitastjórn að loka sundlauginni tímabundið. Hún hafði verið opin á sumrin og einnig notuð til sundkennslu. Kvennfélagið Hlíf hóf söfnun fyrir endurbótunum og náði að safna einni og hálfri milljón. Mikill skriður komast á söfnunina þegar Lionsklúbburinn Svanur og íþróttafélagið Hrafnkell Freysgoði lögðust á sveif með kvennfélagskonum og tókst að safna fyrir endurbótum sem lauk um helgina.
Sif segir að heildarkostnaður hafi verið vel á fjórðu milljón en félögunum hafi tekist að fjármagna það með framlögum frá einstaklingum og fyrirtækum í sveitarfélaginu. Fólk hafi alltaf verið að vona að fé til lagfæringa fyndist hjá sveitarfélaginu en svo hafi komið í ljós að einungis þurfti samtakamátt íbúanna.
