Athugið þessi frétt er meira en 8 ára gömul.

Hissa á að ástand Lagarfljóts komi á óvart

14.03.2013 - 08:37
Mynd með færslu
 Mynd:
Fréttir um veruleg áhrif Kárahnjúkavirkjunar á lífríki Lagarfljóts koma ekki á óvart segir Ásdís Hlökk Theodórsdóttir skipulagsfræðingur. Hún er fyrrverandi starfsmaður Skipulagsstofnunar og vann að úrskurði stofnunarinnar þar sem lagst var gegn framkvæmdunum.

Ásdís sagði í viðtali í Morgunútvarpinu á Rás tvö í morgun það frekar koma á óvart að áhrifin á lífríki Lagarfljóts skuli koma á óvart.

„Fréttir um veruleg áhrif virkjunarinnar koma ekki á óvart. Það er eitthvað sem ég tel að hafi legið fyrir í málinu á sínum tíma og meðal annars kom fram í úrskurði Skipulagsstofnunar að það væru talin líkleg veruleg áhrif á lífríki lagarfljóts,“ segir Ásdís.

Hún segir að framkvæmdin hafi verið feikilega stór og að þó svo að framleiddir hafi verið hillumetrar af gögnum og unnar rannsóknir þá náði framkvæmdin yfir stórt svæði umhverfisáhrif því verið margvísleg. Ásdís segir að kannski hafi ekki verið fjallað svo ítarlega um hvern og einn þátt og að ekki hafi legið fyrir svo ítarleg gögn. Skipulagsstofnun hafi því ekki getað sagt fyrir um nákvæmlega hver áhrifin af framkvæmdinni yrðu þó fyrir séð var að þau yrðu mikil.