Hildur Guðnadóttir tónlistarmaður ársins hjá Grapevine

Mynd með færslu
 Mynd: Timothée Lambrecq - Reykjavík Grapevine

Hildur Guðnadóttir tónlistarmaður ársins hjá Grapevine

10.01.2020 - 14:09

Höfundar

Hildur Guðnadóttir, Hatari og K.óla á meðal listamanna sem fá tónlistarverðlaun tímaritsins Reykjavík Grapevine í ár.

Tímaritið Reykjavík Grapevine tilkynnti í dag hvaða listamenn fá tónlistarverðlaun tímaritstins í ár

Hildur Guðnadóttir tónskáld hlýtur titilinn Tónlistarmaður ársins (Artist of the year). „Ég fann mikla breytingu eftir #metoo byltinguna. Tónlistariðnaðurinn er miklu meðvitaðri um skort á framlagi kvenna til kvikmyndatónlistar og tölurnar tala sínu máli,“ sagði Hildur í viðtali við blaðið tveimur dögum áður en hún hlaut Golden Globe verðlaunin. „Ég held samt að besta leiðin til þess að breyta þessu sé að mæta í vinnuna og sýna þannig gott fordæmi.“ Í viðtalinu kom meðal annars fram að hún ætlar að hvíla sig á kvikmyndatónlist að sinni og hyggi á samstarf með Ólafi Elíassyni myndlistarmanni.

Hatari með lag ársins

Lag ársins að mati Reykjavík Grapevine er Hatrið mun sigra, umdeilt framlag hljómsveitarinnar Hatara til Eurovision.

K.óla, sem prýðir forsíðu tímaritsins í ár, fær sérstaka viðurkenningu í flokki sem kallast á íslensku, „Það sem þú ættir að hafa heyrt“. Hún gaf út plötuna Allt Verður Alltílæ sem vakti umtalsverða athygli á síðasta ári og kom henni rækilega á tónlistarkortið. 

Þungarokkshljómsveitin Une Misère hlýtur viðurkenningu fyrir bestu plötu ársins, Sermon, en hljómsveitin hefur náð eftirtektarverðum alþjóðlegum árangri á sviði þungarokksins. 

Þá fær raftónlistarmaðurinn Bjarki [Rúnar Sigurðsson] og leikstjórarnir Daníel Heimisson og Baldvin Vernharðsson, viðurkenningu fyrir besta íslenska mydbandið í ár við lagið ANA5 af plötu Bjarka, Happy Earthday. 

Kælan Mikla fær viðurkenningu fyrir bestu tónleikaframmistöðuna á árinu.

Mynd með færslu
 Mynd: Reykjavík Grapevine
Kælan mikla.

RA:TIO fá viðurkenningu í flokknum, „Sveitir sem þú ættir að fylgjast með“ en þeir hafa átt farsælt samstarf með landsfrægum popplistamönnum eins og GDRN, nýstirninu Unu Schram og partýsveitinni ClubDub.  

Að lokum er hvatningaverðlaunum Reykjavík Grapevine (e. Shout out) deilt á milli Halldórs Eldjárn sem fangaði tungllendinguna í tónlistarformi, og listahópsins Post-dreifingu sem annaðist umgjörð tónlistarhátíðarinnar „Hátíðni“ síðasta sumar.

Alls fengu níu listamenn verðlaun hjá tímaritinu í átta flokkum en í dómnefnd voru Sigtryggur Baldursson, tónlistarmaður og framkvæmdastjóri ÚTÓN, Anna Gyða Sigurgísladóttir útvarpskona á RÚV, Geoffrey Huntington-Williams, einn af eigendum Priksins og stofnendum plötuútgáfunnar Sticky, Maria-Carmela Raso tónlistarhaldari og listamaður auk menningarblaðamanna Reykjavík Grapevine, Hannah Jane Cohen og Alexander Jean Edvard Le Sage De Fontenay.

Verðlaunin verða afhent formlega 17. janúar.