Athugið þessi frétt er meira en 4 ára gömul.

Helstu stefnumál nýrrar ríkisstjórnar kynnt

26.06.2019 - 07:17
epa07673563 Mette Frederiksen of The Danish Social Democrats address the press after finalizing the government negotiations at Christiansborg Castle in Copenhagen, Denmark, shortly after midnight midnight on 26 June 2019. Mette Frederiksen informed the press that The Danish Social Democrats will form a minority government backed by three other left-wing parties.  EPA-EFE/Mads Claus Rasmussen  DENMARK OUT
 Mynd: EPA-EFE - RITZAU SCANPIX
Mette Frederiksen, leiðtoga Jafnaðarmanna, tókst í gærkvöld að tryggja stuðning þriggja vinstriflokka, Sósíalíska þjóðarflokksins, Einingarlistans og Róttækra við minnihlutastjórn Jafnaðarmanna, undir hennar forsæti. Í stefnuyfirlýsingu stjórnarinnar er lögð mikil áhersla á umhverfis-, loftslags- og velferðarmál, auk málefna útlendinga og hælisleitenda.

Í stjórnarsáttmálanum, sem Frederiksen segir ekki eiginlegan stjórnarsáttmála heldur frekar stefnuyfirlýsingu stjórnarinnar, er farið yfir helstu atriði sem flokkarnir komu sér saman um að leggja áherslu á.

Í þessu átján blaðsíðna plaggi, sem ber yfirskriftina Retfærdig retning for Danmark, eða Réttlát leið fyrir Danmörku, eru loftslags- og umhverfismál efst á blaði og ætlunin er að minnka losun gróðurhúsalofttegunda um 70 prósent til ársins 2030.

Styrkja skal velferðarkerfið og draga úr misskiptingu

Áhersla er lögð á að styrkja velferðar- og menntakerfið og berjast gegn vaxandi misskiptingu og miðstýringu.  Málefni flóttafólks og útlendinga koma líka við sögu og meðal annars kveðið á um að bæta aðstæður barnafjölskyldna í röðum flóttafólks og hælisleitenda sem vísa á úr landi.

Einnig skal falla frá áformum um að vista glæpamenn úr þessum hópi, sem ekki er hægt að vísa úr landi, í aflagðri rannsóknarstöð smitsjúkdóma á lítilli eyju á Eystrasalti og stefnt að móttöku fleiri kvótaflóttamanna, um leið og greiða skal leið erlends vinnuafls inn í landið á ný.

Þá fékk Sósíalíski þjóðarflokkurinn kosningaloforð sitt um lögbundna lágmarksþjónustu á leikskólum og ungbarnaleikskólum, en ekki liggur fyrir hvort ýtrustu kröfur þeirra þar að lútandi, um einn kennara á hver sex leikskólabörn og einn á hver þrjú börn í yngslu deildunum. Loks komu flokkarnir fjórir sér saman um að fella niður samræmd próf í yngstu bekkjum grunnskóla. 
 

 

Ævar Örn Jósepsson
Fréttastofa RÚV