Harðasta álagsprófið um fjármálastöðugleika

Mynd með færslu
 Mynd: RÚV - Eggert Þór Jónsson - RÚV
Sviðsmynd fjármálastöðugleika í álagsprófi Seðlabankans er sú harðasta, sem gerð hefur verið hingað til í bankanum, því óvissa og órói er mikill hér og ytra. Þetta segir framkvæmdastjóri í bankanum. Áhætta hefur aukist síðan bankinn kynnti síðast mat á fjármálastöðugleika í apríl. 

Riti bankans um fjármálastöðugleika var fylgt úr hlaði í fundarsal bankans, Sölvhóli fyrir hádegi. Á vef bankans er ritið ásamt kynningunni í morgun.

„Óvissa hefur aukist og áhætta og kannski að hvetja heimilin og fyrirtækin og bankana til þess að stíga svolítið varlega til jarðar á næstunni til þess að vera í stand búin að takast á við áföll ef að þessi óvissa snýst hratt við.“

Af hverju er áhættan meiri?

„Áhætta hefur aukist í starfsemi tengdri ferðaþjónustu frá því til dæmis í vor vegna þess að það hefur dregið úr komu ferðamanna til landsins. Olíuverð hefur einnig hækkað mikið og það er mikil samkeppni í flugrekstri þannig að það hefur reynt töluvert á þanþol flugfélagana og jafnvel komið í ljós rekstrarerfiðleikar þar,“ segir Rannveig Sigurðardóttir aðstoðarseðlabankastjóri.

Þá er áhætta tengd atvinnuhúsnæði meiri en í vor, verð á því hafi áfram hækkað hratt og er orðið mjög hátt í sögulegu samhengi, segir hún. Þannig að ef yrðu áföll eða samdráttur og verð á atvinnuhúsnæði lækkaði hratt þá gætu bankarnir tapað útlánum. Þá segir Rannveig athyglisvert að verðhækkun á íbúðarhúsnæði hafi stöðvast miðað við aðrar stærðir eins og laun. 

„Skuldavöxtur heimilanna er enn sem komið er ekki mikill sérstaklega í ljósi þess hve veðrými hefur aukist með hækkandi húsnæðisverði.“ 

Það gæti hins vegar breyst í hröðum samdrætti svo Rannveig segir að Seðlabankinn hvetji heimilin til þess að nýta ekki aukið veðrými á íbúðarhúsnæði til að auka við skuldir. Á fundinum í morgun kynnti Harpa Jónsdóttir framkvæmdastjóri fjármálastöðugleika í Seðlabankanum álagspróf bankans sem meðal annars er ætlað að meta styrk kerfislega mikilvægu bankanna þriggja það er Arion banka, Íslandsbanka og Landsbanka ef áföll yrðu: 
 
„Þetta er harðasta próf sem við höfum keyrt hingað til en er í takt við það sem við erum að sjá erlendis. Það eru allir að keyra mjög hörð próf núna því það er svo mikil óvissa og órói.“

Þórdís Arnljótsdóttir
Fréttastofa RÚV
Síðast:
Þessi þáttur er í hlaðvarpi