Athugið þessi frétt er meira en 9 ára gömul.

Hafnar kröfu um Passíusálma

02.03.2012 - 15:45
Mynd með færslu
 Mynd:
Páll Magnússon, útvarpsstjóri, hefur hafnað kröfu Simon Wiesenthal-stofnunarinnar í Los Angeles um að hætt verði að útvarpa Passíusálmunum á Rás 1. Hann sendi Abraham Cooper, rabbína við stofnunina, bréf þess efnis í morgun.

Abraham Cooper gagnrýndi Passíusálmana í bréfi til Páls í febrúar. Hann sagði að í sálmunum væri fimmtíu sinnum vísað til gyðinga, og alltaf á neikvæðan hátt. Flestar þessara tilvísana ýttu undir hatursfullar hugmyndir um gyðinga.

Í svari sínu til Coopers segir Páll að þó að honum finnist upplýst umræða um efni og anda Passíusálmanna bæði gagnleg og áhugaverð sé það eindregin skoðun hans að fremur ströng túlkun stofnunarinnar á sálmunum eigi ekki við rök að styðjast. Hann biður rabbínann að hafa í huga að sálmarnir hafi verið ortir fyrir 350 árum síðan og að þeir lýsi atburðum sem eigi að hafa átt sér stað fyrir um tvö þúsund árum. Passíusálmarnir séu í hávegum hafðir og séu mikilvægur hluti íslenkskrar sögu og menningararfleifðar. RÚV muni halda áfram að útvarpa þeim þegar við eigi.

Margrét Eggertsdóttir, rannsóknarprófessor við Árnastofnun, les sálmana á Rás eitt virk kvöld fram að páskum.

Bréf Páls til Coopers má lesa í viðhengi við þessa frétt.