Guðmundur Franklín er ekki kjörgengur

Mynd með færslu
 Mynd:
Guðmundur Franklín Jónsson, formaður Hægri grænna, er ekki á kjörskrá og þar með ekki kjörgengur. Guðmundur hafði ekki hugmynd um þetta þegar fréttastofa hafði samband við hann fyrr í dag.

Guðmundur hefur lengi haft lögheimili erlendis og sótti um flutning á lögheimili sínu til Íslands í dag. Frestur til að færa lögheimili sitt til landsins og komast þannig á kjörskrá í tæka tíð fyrir kjördag 27. apríl rann út 23. mars. Sem íslenskur ríkisborgari búsettur erlendis hefði Guðmundur þurft að sækja um að komast á kjörskrá fyrir 1. desember.

Í samtali við fréttavef RÚV segist Guðmundur ekki hafa hugsað út í það. Hann hafi talið að flutningur á lögheimili nú myndi nægja.

Í viðtali við Smuguna í nóvember sagði Guðmundur að næsta mál á dagskrá hjá sér væri að flytja lögheimilið hingað til lands.

Guðmundur segist verða að finna nýjan mann í fyrsta sæti á framboðslista Hægri grænna í Suðvesturkjördæmi. Hann hyggst þó áfram gegna formennsku í flokknum. Guðmundur segir að lögmaður sinn sé núna að skoða hvort hann geti kært sig inn á kjörskrá.

Samkvæmt upplýsingum frá Þjóðskrá Íslands er ekki hægt að sækja um undanþágu frá þessum reglum og samkvæmt því getur Guðmundur Franklín ekki boðið sig fram í komandi Alþingiskosningum í vor.