Athugið þessi frétt er meira en 4 ára gömul.

Greiða atkvæði um stjórnina í dag

Mynd með færslu
 Mynd: Vilhjálmur Þór Guðmundsson - RÚV
Flokksstofnanir Vinstri grænna, Sjálfstæðisflokks og Framsóknar greiða atkvæði síðar í dag og í kvöld um málefnasamning flokkanna. Verði hann samþykktur tekur ný ríkisstjórn undir forystu Katrínar Jakobsdóttur við völdum á morgun. Hækkun fjármagnstekjuskatts, lengra fæðingarorlof og uppbygging innviða er meða áherslumála nýrrar ríkisstjórnar. 

Flokksstofnanir flokkanna þriggja koma saman til fundar síðar í dag og í kvöld til þess að afgreiða þann málefnasamning sem formenn flokkanna hafa náð samkomulagi um. Lítið sem ekkert hefur verið gefið upp um innihaldið annað en að það muni koma á óvart og þar muni kveða við nýjan tón.

En þó eru nokkur atriði byrjuð að kvisast út. Má þar nefna að fallið verði frá fyrirætlunum að hækka virðisaukaskatt á ferðaþjónustu og að gistináttagjald renni beint til sveitarfélaga. Áhersla verði lögð á að bæta afkomu aldraðra og öryrkja og að lengja fæðingarorlof og hækka. Endurskipuleggja eigi fjármálakerfið og gefa út hvítbók og það mun stefnt að því að hækka fjármagnstekjuskatt úr 20 prósentum í 22. Þá á að byggja upp innviði og nota til þess fjármagn úr bönkunum. Þá mun vera stefnt að því að auka útgjöld til heilbrigðismála. Næstum öll þessi mál voru á stefnuskrá flokkanna fyrir kosningarnar í október. 

Langflestir úr röðum væntanlegra stjórnarliða sem fréttastofa hefur náð tali af segja að þeim lítist vel á málefnasamninginn þótt þeir hafi ekki kynnt hann sér í þaula. Formenn flokkanna hafa haldið honum þétt að sér og verður hann ekki kynntur opinberlega fyrr en á morgun. En samþykki flokksstofnanir samninginn í kvöld verður morgundagurinn viðburðaríkur. Þingflokkar koma saman í fyrramálið til að afgreiða ráðherraefni, síðan verður málefnasamningurinn kynntur og formleg stjórnarskipti verða svo eftir hádegi eða síðdegis á Bessastöðum. 

Búist er við að fundir flokksstofnana verði fjölmennir, þeir eru lokaðir fjölmiðlum en við flytjum ykkur fréttir af niðurstöðu þeirra um leið og þær berast.