Athugið þessi frétt er meira en 4 ára gömul.

Glænýtt lag frá Emmsjé Gauta: „Lyfti mér upp“

Mynd: © Florian Trykowski / www.floriantrykowski.de

Glænýtt lag frá Emmsjé Gauta: „Lyfti mér upp“

11.11.2016 - 18:22

Höfundar

Ný plata úr smiðju Emmsjé Gauta kemur út eftir 5 daga, á 27 ára afmælisdegi rapparans 19. nóvember næstkomandi. Um er að ræða 10 laga plötu, sem verður dreift frítt á netinu en hún kemur líka út í vínylplötu og í formi geisladisks. Þetta er önnur plata hans á árinu en platan Vagg og Velta kom út fyrir þremur mánuðum. Emmsjé Gauti frumflutti lag af nýju plötunni, Lyfti mér upp, í Síðdegisútvarpinu. 

Emmsjá Gauti er líka búinn að láta útbúa dótakall í eigin mynd, svokallaðan He-Man karl. Þá eru margir sem hafa spilað tölvuleikinn hans, sem miðar að því að koma rapparanum inn á Prikið í Bankastrætinu þar sem hann hyggst halda útgáfupartí nýju plötunnar á fimmtudag í næstu viku.

Ekki að reyna að þóknast einhverjum hópi
„Þemað á þessari plötu var að stroka ekkert út og halda í ræturnar og muna að mér finnist ótrúlega gaman að rappa. Ég hef alveg dottið inn í tímabil þar sem ég hef reynt að semja fyrir aðra og þóknast einhverjum hópi og þá verður þetta jafnleiðinlegt og stjórnmálaumræðan hérna áðan [viðtal við Benedikt Jóhannesson formann Viðreisnar, sem var fyrr í þættinum]. Viðlagið er bara, það er engin tenging: ég lyfti lóðum og lyfti mér upp, ég held mér góðum og lyfti mér upp,“ segir Emmsjé Gauti.