Athugið þessi frétt er meira en 6 ára gömul.

Gísli Freyr játar að hafa lekið gögnum

11.11.2014 - 17:57
Mynd með færslu
 Mynd:
Gísli Freyr Valdórsson, aðstoðarmaður innanríkisráðherra, upplýsti á fundi með Hönnu Birnu Kristjánsdóttur að hann hefði afhent skjal úr ráðuneytinu varðandi hælisleitandann Tony Omos til fjölmiðla. Þetta kemur fram í yfirlýsingu frá Hönnu Birnu sem fjölmiðlum barst nú rétt í þessu.

Ráðherran segir í yfirlýsingunni að trúnaðarbrot Gísla gagnvart sér, ráðuneytinu og almenningi öllum sé algjört og alvarlegt. Hann hafi ítrekað haldið fram sakleysi sínu, ekki aðeins gagnvart yfirvöldum og fjölmiðlum heldur einnig gagnvart samstarfsfólki sínu og yfirmönnum í ráðuneytinu.

Gísli Freyr var ákærður fyrir að leka trúnaðarupplýsingum í málinu. Hann neitaði sök fyrir dómi og átti að aðalmeðferð að fara fram í málinu á morgun. Því var hins vegar frestað og sagði Helgi Magnús Gunnarsson, saksóknari í málinu, að það væri gagna sem báðir aðilar málsins hefðu aflað. Meðal þeirra sem áttu að koma fyrir dóminn á morgun var Hanna Birna Kristjándóttir, innanríkisráðherra.

Hanna Birna segir í yfirlýsingu sinni í kvöld að hún harmi brot Gísla Freys: „ekki aðeins gagnvart þeim sem brotið var gegn með lekanum sjálfum, heldur einnig gagnvart því samstarfsfólki sem trúað hefur yfirlýsingum hans um sakleysi og því hvernig athæfi hans hefur varpað skugga á störf ráðuneytisins um margra mánaða skeið.“

Hanna Birna segir að sú staðreynd að fyrrverandi aðstoðarmaður hennar hafi brotið svo alvarlega á trúnaði gagnvart sér sem ráðherra. „ sem ítrekað hef haldið uppi vörnum fyrir hann í því trausti að hann hefði skýrt mér og öðrum satt og rétt frá, kemur mér algjörlega í opna skjöldu og er þyngri byrði fyrir mig en ég get lýst í fáum orðum.“

[email protected]

Fréttatilkynning innanríkisráðherra.

Fyrrverandi aðstoðarmaður minn, Gísli Freyr Valdórsson, óskaði síðdegis í dag eftir fundi með mér í framhaldi af tilkynningu frá Héraðsdómi Reykjavíkur um að réttarhöldum í máli ríkissaksóknara gegn Gísla Frey hefði verið frestað.

Gísli Freyr játaði svo á fundinum mér að hann hefði afhent skjal úr ráðuneytinu varðandi hælisleitanda til fjölmiðla í nóvember 2013.

Trúnaðarbrot Gísla Freys gagnvart mér, ráðuneytinu og almenningi öllum er algjört og alvarlegt.  Gísli Freyr hefur ítrekað haldið fram sakleysi sínu, ekki aðeins gagnvart yfirvöldum og fjölmiðlum, heldur einnig gagnvart samstarfsfólki sínu og yfirmönnum í ráðuneytinu.

Í framhaldi af játningu Gísla Freys var honum fyrirvaralaust vikið úr störfum í ráðuneytinu.

Ég harma brot Gísla Freys, ekki aðeins gagnvart þeim sem brotið var gegn með lekanum sjálfum, heldur einnig gagnvart því samstarfsfólki sem trúað hefur yfirlýsingum hans um sakleysi og því hvernig athæfi hans hefur varpað skugga á störf ráðuneytisins um margra mánaða skeið.

Sú staðreynd að fyrrverandi aðstoðarmaður minn hafi brotið svo alvarlega á trúnaði gagnvart mér sem ráðherra, sem ítrekað hef haldið uppi vörnum fyrir hann í því trausti að hann hefði skýrt mér og öðrum satt og rétt frá, kemur mér algjörlega í opna skjöldu og er þyngri byrði fyrir mig en ég get lýst í fáum orðum.


[email protected]