Athugið þessi frétt er meira en 7 ára gömul.

Gísli Freyr ákærður í lekamálinu

15.08.2014 - 19:24
Mynd með færslu
 Mynd:
Ríkissaksóknari hefur tilkynnt Gísla Frey Valdórssyni, aðstoðarmanni Hönnu Birnu Kristjánsdóttur innanríkisráðherra, að hann verði ákærður fyrir að leka minnisblaði um hælisleitandann Tony Omos úr ráðuneytinu í fjölmiðla.

Gísli Freyr verður ákærður fyrir brot á þagnarskyldu. Hann hefur ætíð haldið því fram í skýrslutökum hjá lögreglu að hann hafi ekki látið fjölmiðla hafa minnisblaðið. Hvorki hefur náðst í Hönnu Birnu né Gísla Frey nú undir kvöld. Hanna Birna sendi frá sér eftirfarandi yfirlýsingu nú á áttunda tímanum: 

Rétt í þessu tilkynnti annar aðstoðarmaður minn, Gísli Freyr Valdórsson, mér að lögmaður hans hefði nú síðdegis fengið upplýsingar um að ríkissaksóknari hyggðist birta honum ákæru vegna kæru vegna meðferðar persónuupplýsinga um hæliseitenda.  

Þrátt fyrir að Gísli Freyr hafi ávallt haldið því fram gagnvart mér að hann sé með öllu saklaus af málinu og geri það enn, hef ég tekið þá ákvörðun að leysa hann nú þegar frá störfum á meðan málið er til meðferðar fyrir dómsstólum.    

Ég hef að auki óskað eftir því við forsætisráðherra að þau málefni sem undir mig heyra og hafa með dómsstóla og ákæruvald að gera færist til annars ráðherra í ríkisstjórn á meðan dómsmál á hendur Gísla Frey stendur yfir, enda tel ég mikilvægt að friður skapist um fjölmörg mikilvæg verkefni innanríkisráðuneytisins.