Athugið þessi frétt er meira en 1 ára gömul.

Gagnrýna harðlega stöðuna í kjaradeilu við Rio Tinto

23.02.2020 - 11:21
Mynd með færslu
 Mynd: Guðmundur Bergkvist Jónsson - RÚV
Stjórn VM gagnrýnir harðlega þá stöðu sem komin er upp í kjaradeilu félaga í VM og Rio Tinto. „Það er ekki boðlegt að tilbúinn samningur um kjör starfsmanna álversins sé notaður til þess að semja um verð á orku fyrir álverið sem er algjörlega óskylt mál,“ segir í ályktun félagsins. 

VM segir samning liggja á borðinu sem sé í aðalatriðum það sem samið var um í lífskjarasamningnum sem skrifað var undir á almenna markaðinum á vormánuðum. Kostnaðarauki vegna þessa samnings sé að hámarki 0,5% af rekstrarkostnaði fyrirtækisins og því ljóst að fyrirtækið standi ekki eða falli með þessum kjarabótum starfsmanna.

„Starfsmenn hafa verið samningslausir í rúma 10 mánuði og þolinmæðin þeirra er löngu þrotin,“ segir í ályktuninni. 

Stjórn VM krefst þess að Rio Tinto skrifi undir kjarasamning við sína félagsmenn strax enda sé ekki boðlegt fyrir félagsmenn VM að bíða lengur eftir kjarabótum.