Mynd: Anton Brink - Ruv.is
Athugið þessi frétt er meira en 6 ára gömul.
Gæti draumur um matarmarkað á Hlemmi ræst?
Reykjavíkurborg er að taka við rekstri Hlemms og Mjóddar af Strætó. Dagur B. Eggertsson borgarstjóri vekur máls á þessu í vikulegum pósti sínum. Hann telur að það yrði spennandi að blanda saman verslun og þjónustu á Hlemmi og segir: „Hver veit nema draumurinn um matarmarkað á Helmmi geti ræst?“
Haustið 2012 samþykkti borgarstjórn að efna til samráðs um framtíðarnotkun skiptistöðvarinnar á Hlemmi. Fram kemur í póstinum frá Degi að tvær ólíkar arkitektastofur hafi velt upp flötum á notkun Hlemms og Mjóddar og að næstu skref verið að auglýsa eftir hugmyndum og rekstaraðilum fyrir þessi ólíku hús.
Fleiri borgarbúa dreymir um matarmarkað á Hlemmi heldur en borgarstjórann, en sú hugmynd hefur reglulega skotið upp kollinum. Meðal annars kom Miðborgin okkar, samstarfsvettvangur rekstraraðila í miðborginni, fram með þá hugmynd að á Hlemmi yrði lífrænn matarmarkaður og svipuð tillaga hefur verið til umfjöllunar á samráðsvettvangnum Betri Reykjavík.
