Mynd: EPA-EFE - EPA
Athugið þessi frétt er meira en 2 ára gömul.
Fyrrverandi útibússtjóri Danske Bank horfinn
Lögregla í Tallinn í Eistlandi hefur frá því í gær leitað að Aivar Rehe, fyrrverandi útibússtjóra Danske Bank í borginni. Hann fór að heiman frá sér í gærmorgun í íþróttagalla og farsímalaus. Lögregluna grunar að honum hafi verið rænt og að hann sé í lífshættu, að því er Bloomberg fréttaveitan greinir frá.
Talið er að um sex þúsund viðskiptavinir Danske Bank í Eistlandi tengist umfangsmiklu peningaþvætti sem stundað var á árunum 2007 til 2015. Rannsókn leiddi í ljós að jafnvirði 28 þúsund milljarða íslenskra króna fóru gegnum útibúið á þeim tíma. Talið er að stór hluti upphæðarinnar tengist peningaþvætti.
Ekki er vitað til þess að Aivar Rehe hafi hafi tengst þessari glæpastarfsemi. Lögreglumenn með leitarhunda og dróna hafa ásamt sjálfboðaliðum leitað að honum í gær og í dag.
