Athugið þessi frétt er meira en 3 ára gömul.

Flóttamaður ákærður eftir sjálfsvígstilraun

24.06.2019 - 06:39
epa06129703 (FILE) - Asylum seekers are seen behind a fence at the Manus Island detention center, in Papua New Guinea (PNG), 21 March 2014 (reissued 07 August 2017). According to media reports on 07 August 2017, an Iranian asylum seeker, named as Hamed
 Mynd: EPA
Indverskur maður sem reyndi að fyrirfara sér í flóttamannabúðum í Papúa Nýju-Gíneu veðrur ákærður fyrir íkveikju og tilraun til sjálfsmorðs. AFP fréttastofan hefur þetta eftir lögreglu á eyjunni Manus þar sem flóttamannabúðirnar eru.

Ravinder Singh er frá Punjabi héraði í Indlandi. Hann er á fertugsaldri og freistaði þess að komast sjóleiðina til Ástralíu og sækja um hæli. Líkt og aðrir flóttamenn sem nást á sjóleiðinni til Ástralíu var honum komið fyrir í flóttamannabúðum í Manus. Þar dvelur hann ásamt um 500 flóttamönnum og umsækjendum um alþjóðlega vernd.

Á föstudag læsti Singh sig inni í gámnum sem honum er úthlutað í flóttamannabúðunum. Þar kveikti hann í, og náði eldurinn að læsa sig í tveimur herbergjum í búðunum til viðbótar áður en náðist að slökkva hann. Singh var fluttur til Port Moresby á meginlandi Papúa Nýju-Gíneu þar sem gert var að brunasárum sem hann hlaut í andliti og hægri hönd. David Yapu, lögreglustjóri á Manus, segir að Singh hafi verið yfirheyrður á sjúkrahúsinu í gær, og hans bíði ákæra þegar hann útskrifast þaðan.

Flóttamenn sem eru í haldi á Manus voru áður í flóttamannabúðum á vegum ástralskra stjórnvalda. Nú hefur þeim verið komið fyrir í einkareknum búðum, á meðan þeir bíða þess að unnið sé úr umsóknum þeirra. Ástralía neitar að samþykkja umsóknir þeirra sem reyna að koma sjóleiðina til landsins, og hafa þess í stað reynt að gera samninga við öruggt þriðja land. Bandaríkin eru eitt þeirra og hafa nokkrir flóttamenn verið fluttir þangað. Ferlið er hins vegar langt, og hafa margir flóttamannanna dvalið í Manus árum saman.

AFP fréttastofan greinir frá því að fréttamenn á hennar vegum hafi heimsótt búðirnar í Manus í fyrra. Aðstæður flóttamanna eru þar bágar og þeir sem þar dvelja kljást margir hverjir við þunglyndi. Mannréttindasamtök og Sameinuðu þjóðirnar hafa fordæmt framkomu ástralskra stjórnvalda í garð flóttamannanna. Scott Morrison, forsætisráðherra Ástralíu, segir stefnu stjórnvalda hins vegar nauðsynlega til að stemma stigu við smygli á fólki og til að koma í veg fyrir drukknun flóttamanna á hafi úti.