Mynd: Rúnar Snær Reynisson - RÚV
Athugið þessi frétt er meira en mánaðargömul.
Fjarðarheiðargöngum verður flýtt
Fjarðarheiðargöngum milli Egilsstaða og Seyðisfjarðar verður flýtt og framkvæmdir við þau hefjast árið 2022 á fyrsta tímabili endurskoðaðrar samgönguáætlunar, samkvæmt drögum sem Sigurður Ingi Jóhannsson samgönguráðherra kynnti í Norræna húsinu í Reykjavík í morgun. Áður höfðu göng til Seyðisfjarðar verið á þriðja tímabili samgönguáætlunar. Göngin verða fjármögnuð bæði með framlagi úr ríkissjóði og með veggjöldum. Kostnaður er áætlaður 35 milljarðar en dreifist á 7 ára framkvæmdatíma.
Jóna Árný Þórðardóttir, framkvæmdastjóri Austurbrúar, sagði á fundinum að fyrir austan séu samfélög sem hafi tækifæri til að byggja upp mjög sterkt miðsvæði á Austurlandi. Það eigi sóknarfæri og geti laðað til sín fólk og byggt upp atvinnulífið. Svæðið eigi mikið inni í þróun næstu áratugi. Þjóðhagslega tábatasamt sé að gefa Austurlandi slíkt tækifæri með samgöngubótum.
Framkvæmdir við göng frá Seyðisfirði til Mjóafjarðar og áfram til Norðfjarðar verða samkvæmt áætluninni á þriðja tímabili 2030-2034 en þau eiga að kosta 31 milljarð.
Veggjöld eiga að standa undir helmingi kostnaðar við jarðgöng og er gert ráð fyrir því að gjaldtaka hefjist í eldri göngum einnig til að standa undir rekstri þeirra og fjármagna ný göng.
Öxi og Hornafjarðarfljót líka á fyrsta tímabili
Af öðrum framkvæmdum á Austurlandi má nefna að ljúka á framkvæmdum við veg yfir Hornafjarðarfljót á fyrsta tímabili og einnig við heilsársveg yfir Öxi, samkvæmt þessum drögum en Alþingi á eftir að fjalla um uppfærða samgönguáætlun og þá eru framkvæmdir einnig háðar fjárlögum hvers árs. Í áætluninni er gert fyrir veggjaldi bæði á Öxi og vegi yfir Hornafjarðarfljót.
Í samráðsgátt stjórnvalda má kynna sér bæði fimm ára framkvæmdaáætlun og 15 ára langtímaáætlun.
