Fengu ýtu í sveitinni til að kippa í trukkinn

Starfsmenn Rarik hafa staðið í ströngu vegna fjölda bilana og annarra vandræða í raforkukerfinu vegna óveðursins sem geisað hefur á landinu síðan í gær. Eitt af mörgum verkefnum fólst í að flytja spenna austur í Kelduhverfi til að koma aftur á rafmagni þar í sveit og í nágrannabyggðum. Farið var með spennana á flutningabíl frá Akureyri en þegar menn nálguðust Vaðlaheiðargöngin var allt kolófært. Fengu þeir þá lánaða jarðýtu í sveitinni til að draga trukkinn í gegnum stærstu skaflana við göngin.