„Ég upplifði algjört svartnætti“

Mynd: RÚV / RÚV

„Ég upplifði algjört svartnætti“

13.09.2019 - 15:11
Eftir að hin margumtalaða Lof mér að falla var frumsýnd fyrir ári upplifði Baldvin Z, leikstjóri myndarinnar, mikinn niðurtúr. Kvikmyndin dregur upp kolsvarta og raunsanna mynd af undirheimum Reykjavíkur, geðveiki, ofbeldi og átakanlegu lífi ungra fíkla á Íslandi.

Leikstjórinn Baldvin Z er flestum Íslendingum kunnur, að minnsta kosti að nafninu til. Hann er einn afkastamesti íslenski leikstjóri síðustu sex ára og hafa myndir hans á borð við Óróa, Vonarstræti og nú síðast Lof mér að falla sem frumsýnd var fyrir ári, jafnan hlotið mikið lof og umtal. Þrátt fyrir velgengnina laugar hann sig þó ekki í sviðsljósinu, hann hefur þvert á móti dregið sig út úr hringiðu umræðunnar, hætt á flestum samfélagsmiðlum og einbeitt sér að því að taka því rólega eftir síðustu mynd hans sem skók Ísland og hluta heimsbyggðarinnar. 

Lof mér að falla var sýnd síðasta sunnudag á RÚV og er enn hægt að horfa á hana í spilaranum hér. Aðalleikkonur myndarinnar þær Elín Sif Halldórsdóttir og Eyrún Björk Jakobsdóttir sem léku fíklana og elskhugana Magneu og Stellu í myndinni, heimsóttu í gær dagskrárgerðarmennina Snærós Sindradóttur, Mikael Emil Kaaber, Hafstein Vilhelmsson og Helgu Margréti Höskuldsdóttur sem eru um þessar mundir í Stúdíói níu í kjallara Útvarpshússins. Þar halda þau til þar til klukkan sjö í kvöld eftir þriggja sólarhringa inniveru þar sem þau hafa verið í beinni útsendingu og vakið athygli á söfnunarátaki Á allra vörum sem ber heitið VAKNAÐU! og er ætlað að sporna gegn fíkniefnaneyslu ungs fólks. Í dag kíkti hins vegar leikstjórinn sjálfur við og ræddi við þau um myndina, lífið eftir Lof mér að falla og það sem fram undan er.

Samfélagsskrímsli sem allir höfðu skoðun á

„Ég er ekki að spá í þessum heimi út frá myndinni lengur en ég á vinkonu sem er á þessum stað í dag og ég spái mikið í því,“ segir hann alvarlegur um umfjöllunarefni myndarinnar. Hann bugaðist loks um áramótin, hafði verið að vinna í myndinni nokkuð sleitulaust frá árinu 2012 og eftir sigurför hennar sprakk hún að eigi sögn í andlitið á honum. „Ég þurfti að minna mig á að ég lagði upp með að gera bíómynd sem átti að opna augu fólks. Mig langaði að sýna inn um dyr sem við kíkjum ekki inn um og fá af stað umræðu. Myndin varð að samfélagsskrímsli og allir voru að tala um hana. Þetta átti hins vegar aldrei að vera forvarnarmynd.“

Baldvin varð nefnilega mikið var við það, sér í lagi á samfélagsmiðlum, að þrátt fyrir mikið lof sem myndin fékk var hún líka gagnrýnd, meðal annars af samtökum sem mæltu ekki með því að horft væri á hana, jafnvel frá fólki sem aldrei hafði séð hana sjálft. „Og þegar fólk var að tala um forvarnargildi myndarinnar langaði mig að árétta að þetta er leikin bíómynd og listsköpun.“

Hann var ánægður með afraksturinn en um áramótin þurfti hann hins vegar að skilja sig aðeins frá henni og huga að næstu verkefnum. „Myndin hefur öðlast sjálfstætt líf, hún er búin að ferðast heimsálfa á milli.“

Ætlar aldrei aftur á Facebook

Í vinnslu myndarinnar kom leikstjóranum einna helst á óvart að horftast í augu við sína eigin fordóma. „Ég hef til dæmis oft sagt að alkóhólismi sé enginn sjúkdómur, að fólk þurfi bara að taka sig taki. Það var gott fyrir mig að brjóta niður þessa fordóma í sjálfum mér. Þeir voru ekki opinberir en sátu í mér. Þetta er nefnilega ekki bara sjúkdómur, þetta er stærra vandamál en að poppa eina pillu. Þetta er geðheilbrigðisvandamál og rótin er alltaf sú sama - vanlíðan ungs fólks og brotin sjálfsmynd.“

Baldvin sagði skilið við samfélagsmiðla eftir að hann áttaði sig á því um áramótin að hann þyrfti að hægja á sér. „Ég upplifði mikið svartnætti,“ segir hann. „Svo kom bara vorið og ég fór af samfélagsmiðlum og hætti að fylgjast með. Ég ætla aldrei aftur á Facebook, það er mannskemmandi apparat.“

Um þessar mundir er hann með nokkur verkefni í þróun en segist vera feginn að vera ekki strax byrjaður í tökum. „Ég er enn að pússla mig saman en hlakka til allra verkefnanna sem bíða mín.“

Baldvin Z var í Endalausu útvarpi og má sjá allt innslagið í spilaranum efst í fréttinni.

Tengdar fréttir

Kvikmyndir

Villisvín trufluðu kynlífssenuna

Tónlist

Zöe með Sumarjarðarför eftir Lof Mér að falla

Sjónvarp

Lof mér að falla með flestar Eddu-tilnefningar