Athugið þessi frétt er meira en 1 ára gömul.

„Ég er bara sjokkeraður“

Mynd: Fréttir / Fréttir
Sighvatur Björgvinsson, fyrrverandi ráðherra og framkvæmdastjóri Þóunarsamvinnustofnunar Íslands, segist vera sjokkeraður yfir umfjöllun kvöldsins um Samherjaskjölin. Öll uppbygging sem unnið hafi verið að í Namibíu hafi hrunið með komu Samherja. Hann segir málið skelfilegt og vonast til að því sé ekki lokið.

Unnu hart að uppbyggingu í Namibíu

Sighvatur segir Namibíumenn ekkert hafa kunnað til sjómennsku eða fiskverkunar og því beðið um aðstoð frá Íslandi. „Við veittum hana, ekki bara Þróunarsamvinnustofnun, heldur fjöldi íslenskra skipstjórnarmanna sem komu og hjálpuðu.“

Íslendingari hafi rekið fyrir þá Landhelgisgæslu, Hafrannsóknarstofnun, búið til kvótakerfi fyrir þá og markaðskerfi, veiðileyfisgjaldið, sem ekki hafi tekist að koma á hér á landi.  

„Við fylgdumst með því á meðan við vorum þarna hvernig þetta væri rekið og gerðum ekki athugasemdir nema mjög sjaldan. Síðan förum við 2008 og síðan kemur Samherji - og þetta er allt hrunið. “

Vonar að málinu sé ekki lokið

Sighvatur segist ekki kunna að meta það hvort eitthvað saknæmt hafi átt sér stað. Koma verði í ljós hvort brotin sem þarna hafi verið framin séu fyrnd.  Hann segist spenntur að sjá viðbrögð þjóðarinnar því viðbrögð stjórnmálamanna fari oft eftir viðbrögðum þjóðarinnar. Þá bendir hann á að  íslenska ríkisstjórnin sé núna að leggja til að lækka veiðileyfagjöld á Samherja um stórfé. 

„Á sama tíma, eins og verið er að sýna okkur fram á  þetta framferði þarna, þá ætla íslensk stjórnvöld með fyrrverandi stjórnarformann Samherja í fararbroddi að lækka veiðileyfigjöldin á þessa útgerð og fleiri. Mér finnst þetta vera bara alveg skelfilegt og ég vona að þessu máli sé ekki lokið.“

Fréttastofa hefur leitast eftir viðbrögðum frá Samherja og innan úr pólitíkinni í allt kvöld, meðal annars frá Þorsteini Má, forstjóra Samherja, og Kristjáni Þór sjávarútvegsráðherra, sem höfðu ekki tök á að veita viðtal.