Söngkonan Glowie er síðasta viðbótin við dagskrá tónleika Ed Sheeran sem fara fram á Laugardalsvelli í sumar. Auk hennar hita Zara Larsson og James Bay upp.
Í tilkynningu frá Senu, skipuleggjendum tónleikanna, segir að Sheeran hafi sjálfur valið Glowie eftir að hafa hlustað á tónlist hennar.
Glowie, sem er 22 ára, komst á plötusamning hjá Columbia árið 2017. Hún býr nú í London þar sem hún vinnur að fyrstu breiðskífu sinni.
Ed Sheeran heldur tvenna tónleika á Laugardalsvelli, 10. og 11. ágúst. Þrjátíuþúsund miðar voru í boði á fyrri tónleikana og seldust þeir upp á innan við þremur tímum. Enn eru lausir miðar á aukatónleikana 11. ágúst.
