Dagný snýr aftur á Selfoss

Mynd með færslu
 Mynd: Mummi Lú - RÚV

Dagný snýr aftur á Selfoss

13.11.2019 - 21:20
Landsliðskonan Dagný Brynjarsdóttir hefur samið við bikarmeistara Selfoss um að leika með liðinu í Pepsi Max-deild kvenna í fótbolta næsta sumar.

Dagný kemur til Selfoss frá Portland Thorns í bandarísku atvinnumannadeildinni og skrifar undir tveggja ár samning. Dagný hefur leikið 85 A-landsleiki og skorað í þeim 25 mörk.

Dagný býr á Selfossi og er ekki ókunnug félaginu því hún hefur spilað 37 leiki fyrir Selfoss í öllum keppnum. Hún spilaði síðast með Selfossi í úrvalsdeildinni 2015 og skoraði þar tíu mörk í 17 deildarleikjum.

„Það er ótrúlega mikilvægt fyrir okkur að hafa náð að semja við Dagnýju. Við stefnum á að bæta árangur liðsins enn frekar og það er heiður fyrir félagið og þýðingarmikið fyrir samfélagið að fá atvinnumann af þessari stærðargráðu til þess að taka þátt í þessu verkefni. Við vitum öll hvað Dagný getur og hún mun klárlega hjálpa okkur að komast á næsta stig. Dagný þekkir Selfoss og er frábær félagsmaður og á eftir að gera mikið fyrir okkur bæði innan og utan vallar,“ segir Alfreð Elías Jóhannsson, þjálfari Selfoss.