He JianKui greinir frá tilraunum sínum í nóvember í fyrra. Mynd: EPA-EFE - EPA
Athugið þessi frétt er meira en mánaðargömul.
Dæmdur fyrir ólöglegar erfðabreytingar
Kínverski vísindamaðurinn He Jiankui, sem í fyrra olli miklu uppnámið þegar hann kvaðst hafa gert erfðabreytingar á börnum, var í morgun dæmdur í þriggja ára fangelsi fyrir að hafa stundað óheimilar aðferðir í læknavísindum. Honum var einnig gert að greiða sekt að jafnvirði rúmlega 50 milljóna króna.
He greindi frá því í nóvember í fyrra að hann hefði gert breytingar á erfðaefni tvíbura sem fæðst hefðu í sama mánuði í þeim tilgangi að koma í veg fyrir að þeir gætu veikst af HIV-veirunni sem veldur alnæmi.
Yfirlýsing hans olli miklu uppnámi og reiði um allan heim og leiddi til mikilla umræðna um siðferði í raunvísindum og eftirlit með vísindarannsóknum í Kína.
