COVID-19: Hert eftirlit með skipakomum

06.03.2020 - 15:13
Mynd með færslu
 Mynd: Hafnarsamlag Norðurlands - Facebook
Veita þarf Landhelgisgæslunni sérstaka heilbrigðisyfirlýsingu vegna COVID-19 vegna allra skipa sem koma til landsins erlendis frá, áður en þeim er veitt heimild til að koma til hafnar. Þetta kemur fram í yfirlýsingu frá Landhelgisgæslunni.

Undir venjulegum kringumstæðum ber að senda Landhelgisgæslunni almenna heilbrigðisyfirlýsingu sem og aðrar upplýsingar. Vegna aðstæðna nú ber skipstjórum og skipslæknum, ef þeir eru um borð, að fylla út sérstakt eyðublað sem getur gefið upplýsingar um COVID-19 smit. Skipum verður ekki hleypt til hafnar nema eyðublaðið berist Landhelgisgæslunni.

Fyrsta skemmtiferðaskip ársins er væntanlegt til Reykjavíkur á mánudag, að því er segir í yfirlýsingu Landhelgisgæslunnar. „Landhelgisgæslan telur ríka ástæðu til að herða eftirlit með skipakomum til landsins á næstunni í samráði við sóttvarnalækni, Samgöngustofu, hafnaryfirvöld og aðra viðbragðsaðila,“ segir jafnframt í yfirlýsingunni. 

Landhelgisgæslan tilkynnir til sóttvarnalæknis ef grunur vaknar um COVID-19 kórónaveirusýkingu. Samráð er þá haft milli sóttvarnalæknis, lögreglu, tollgæslu, hafnaryfirvalda, Samgöngustofu og skipstjóra um að hleypa ekki farþegum frá borði auk þess sem ekki verður heimilt að koma skipinu að bryggju á meðan greining fer fram. Sóttvarnarlæknir, í samráði við aðra viðbragðsaðila, ákveður næstu skref.

dagnyhe's picture
Dagný Hulda Erlendsdóttir
Síðast:
Þessi þáttur er í hlaðvarpi