Coldplay og daglega lífið

Mynd með færslu
 Mynd: Rás 2

Coldplay og daglega lífið

04.12.2019 - 10:15

Höfundar

Í Rokklandi vikunnar er mál málanna nýja platan frá Coldplay, Everyday life, sem er 8unda plata sveitarinnar og kom út fyrir rúmri viku.

Everyday life er tvöfalt albúm. Fyrri platan heitir Sunrise, seinni platan Sunset og þarna kennir ýmissa grasa. Við ætlum í Rokklandinu í dag að hlusta á þessa plötu og reyna að kynnast henni aðeins. Og umsjónarmanni til aðstoðar á því ferðalagi eru t.d. Chris Martin söngvari Coldplay, Vera Illugadóttir, Dr. Arnar Eggert Thoroddsen og Arndís BJörk Ásgeirsdóttir þulur á Rás 1.

Það eru ýmsir sem halda því fram að Coldplay sé stærsta hljómsveit heims í dag og þess vegna þykir það til tíðinda þegar sveitin sendir frá sér plötu.
Tónlistin á Everyday life er fjölbreytt og líkast til fjölbreyttari en á fyrri plötum sveitarinnar. Þarna má finna í bland við hefðbundið Coldplay poppið, Do Whop, sálma, "kvikmyndatónlist", demó og allt mögulegt.

Daginn sem platan kom út hélt hljómsveitin tvenna tónleika í Amman í Jórdaníu, en þar hafði Coldplay aldrei spilað áður. þeir spiluðu fyrri plötuna, Sunrise, við sólarupprás í Amman, og seinni plötuna, Sunset, við sólsetur. Og hvort tveggja var í beinni útsendingu á Youtube, og er þar enn - mjög flott og skemmtilegt.

Og daginn eftir hélt Coldplay tónleika við gamla borgarvirkið í miðborg Amman. Þar spilaði sveitin alla nýju plötuna og 9 önnur lög. En hvers vegna voru þeir að gera þetta þarna í Amman í Jórdaníu. Chris Martin svaraði þeirri spurningu í viðtali í NME fyrir nokkrum dögum og sagði eitthvað á þessa leið: "Við ákváðum að koma hingað vegna þess að hér erum við inni á miðju svæði sem okkur vesturlandabúum er kennt í dag að sé mjög hættulegt í alla staði - við eigum að vera hrædd við stað eins og þennan og þess vegna hugsuðum við; Förum akkúrat þangað, reynum að hafa áhrif á það hvernig fólk hugsar um þennan heimshluta. Við erum vön að heyra mestu öfgarnar um þessa staði, en svo þegar maður kemur þarna sjálfur áttar maður sig fljótt á því að þarna er bara venjulegt fólk sem vill fá að njóta lífsins, lifa góðu lífi eins og við hin".

Það voru bara 600 manns sem náðu í miða til að sjá Coldplay þarna í Amman. Þeir voru myndaðir líka eins og tónleikarnir tveir daginn áður. Jórdaniu-prins var á meðal áhorfenda ásamt fylgdarliði. Þetta voru ekki risatónleikarnir sem Coldplay eru vanir. Ekki stórt ljósasjó og flugeldar heldur bara 600 manns og lítið af græjum, í miðborg Amman í Jórdaníu.

Coldplay ætlar ekki að spila mikið næstu mánuðina eða árin ef eitthvað er að marka það sem þeir segja í dag. Sveitin spilaði tvisvar í London í vikunni sem leið. Þeir spiluðu fyrir 1000 aðdáendur og gesti í National History Musem í London á þriðjudagskvöldið síðasta og svo kvöldið eftir í beinni útsendingu frá BBC, Maida Vale tónlistarstúdíóinu þeirra hjá BBC. þeim var t.d. útvarpað hérna hjá okkur á Rás 2.

Coldplay ætlar ss. ekki að fylgja þessari plötu eftir með tónleikaferðalagi, vegna þess að tónleikaferðalög hljómsveita menga talsvert. Það er mikið flogið og með mikið af mannskap og allskyns dóti og nú ætlar Coldplay að hugsa hlutina upp á nýtt. Þeir vilja reyna að finna sjálfbærari leið til að spila fyrir fólk, en þegar Coldplay fylgdi eftir síðustu plötu; A Head Full of Dreams, sem kom út 2015 spiluðu þeir 122 tónleika um allan heim. Það voru 109 manns í fylgdarliðinu, 32 risatrukkar sem 9 bílstjórar skiptust á að keyra og það var spilað í 5 heimsálfum fyrir 5.4 milljónir manna. Þeir segjast ekki ætla að túra aftur fyrr en menn séu búnir að finna leið til að gera það sem mengar lítið sem ekkert og helst ekki neitt. Þeir ætla ekki í tónleikaferð fyrr en það verður hægt að gera það sjálfbært og vistvænt.

Allt um þetta og fleira í Rokklandi vikunnar.