Brynjólfur Þorsteinsson hlýtur Ljóðstafinn

Mynd með færslu
 Mynd:

Brynjólfur Þorsteinsson hlýtur Ljóðstafinn

22.01.2019 - 10:58

Höfundar

Brynjólfur Þorsteinsson hlaut í gær Ljóðstaf Jóns úr Vör fyrir ljóð sitt Gormánuður. Athöfnin fór fram í Salnum í Kópavogi en þetta er í 17. sinn sem Ljóðstafurinn er afhentur. Alls bárust 302 ljóð í keppnina.

Brynjólfur er 28 ára en dómnefnd segir ljóð hans Gormánuð „draga fram íslenskan hversdag sem birtist dularfullur og margræður, þar sem samruni náttúru og líkama myndar óljós og áhugaverð mörk milli heima.“ Í öðru sæti var Margrét Lóa Jónsdóttir fyrir ljóðið „Allt sem lifir deyr“ og þriðja sætið hlaut Elías Knörr fyrir ljóðið „Sunnudögum fækkar með sérhverri messu!“ Sérstaka viðurkenningu hlutu auk þess ljóðskáldin Eyrún Ósk Jónsdóttir, Dagur Hjartarson, Arndís Þórarinsdóttir, Vilhjálmur B. Bragason, Hjörtur Marteinsson og Björk Þorgrímsdóttir. Við sama tækifæri voru afhent verðlaun í ljóðasamkeppni Grunnskóla Kópavogs en þar sigraði Katrín Valgerður Gustavsdóttir sem var verðlaunuð fyrir ljóðið Súðavík en hún er nemandi í 10. bekk Kárnsesskóla.

Gormánuður eftir Brynjólf Þorsteinsson handhafa Ljóðstafsins 2019:

allir hrafnar eru gat
líka þessi sem krunkar
uppi á ljósastaur

eins og brot
í himingrárri tönn

sjóndeildarhringurinn nakin tré
skorpin vör

pírðu augun
einblíndu á fjaðursortann

það glittir í úf

allir hrafnar eru gat
og innvolsið uppdráttur að morgundegi

líka í þessum sem krunkar
uppi á ljósastaur

lestu hann
með vasahníf og opinn munn

hjartað springur
eins og ber undir tönn

bragðið er svart

Í dómnefnd voru Ásdís Óladóttir, Ásta Fanney Sigurðardóttir og Bjarni M. Bjarnason, sem höfðu þetta að segja um sigurvegarann. „Vinningsljóðið í keppninni um Ljóðstaf Jóns úr Vör 2019 dregur fram íslenskan hversdag sem birtist dularfullur og margræður, þar sem samruni náttúru og líkama myndar óljós og áhugaverð mörk milli heima. Skáldið  fer með lesandann í tímaflakk með fyrsta orði en titillinn Gormánuður er upphafsmánuður vetrar og vísar til sláturtíðar samkvæmt forna norræna tímatalinu. Innvols dýrs verður uppdráttur að morgundegi sem er hugsanleg veðurspá í gömlum göldrum, við erum minnt á að einblína á fjaðursortann, stara inn í myrkrið, kryfja gat sem er munnur þar sem orðin myndast og þar lesum við í framtíðina með dauðanum sem bíður okkar, heyrum áminningu um brothætt líf eða ást sem sundrast jafn auðveldlega og ber undir tönn. Hið unga skáld fléttar listilega saman andstæðum þar sem ljós og sorti, fortíð og nútíð mynda meistaralega smíðaða heild sveipaða myndríkri dulúð.“

Jón úr Vör fæddist á Vatneyri við Patreksfjörð 21. janúar 1917 en starfaði lengst af í Kópavogi þar sem hann var hvatamaður að stofnun bókasafnsins og síðar fyrsti bæjarbókavörður bæjarfélagsins. Jón starfaði að menningarmálum með ýmsum hætti, var til dæmis bóksali og ritstjóri, en fyrst og fremst var hann brautryðjandi í íslenskri ljóðagerð. Fjölmargar ljóðabækur hans lifa með þjóðinni og ber þá helst að nefna óð hans til æskustöðvanna, ljóðabálkinn Þorpið. Jón úr Vör lést 4. mars árið 2000 og frá árinu 2002 hefur Lista- og menningarráð Kópavogsbæjar afhent Ljóðstaf Jóns úr Vör á fæðingardegi skáldsins.

Tengdar fréttir

Menningarefni

Hlaut Ljóðstaf Jóns úr Vör

Bókmenntir

Ljóðstafur Jóns úr Vör: Silkileið nr. 17

Bókmenntir

Samdi verðlaunaljóð á kvittun

Bókmenntir

Þrjár ungar konur hljóta ljóðaverðlaun