Athugið þessi frétt er meira en 2 ára gömul.

Bíða eftir útspili stjórnvalda

Stór skref í átt að sameiningu sveitarfélaga í Austur-Húnavatnssýslu verða ekki stigin fyrr en stjórnvöld sína spilin. Þetta segir formaður sameiningarnefndar, sem telur að íbúakosning gæti í fyrsta lagi orðið næsta vor.

Blönduósbær, Húnavatnshreppur, Skagaströnd og Skagabyggð hafa verið í viðræðum um sameiningu. Hlé var gert vegna kosninga í vor, en nýjar sveitarstjórnir samþykktu að halda áfram og skipuðu fulltrúa í nýja sameiningarnefnd sem hefur fundað einu sinni. Samningur við ráðgjafa var framlengdur og skipað í sérstakt framkvæmdaráð sem hefur hisst í tvígang.

Vilja fá svör frá stjórnvöldum í janúar

„Og síðan erum við í vinnu, eða að undirbúa það að reyna að fá svör varðandi aðkomu jöfnunarsjóðs og opinberra aðila að verkefninu. Og við ætlum okkur helst að vera búin að fá þau svör fyrir enda janúar.“ segir Þorleifur Ingvarsson, formaður sameiningarnefndarinnar.

Kalla eftir útfærslu á hugmyndum ráðherra

Sigurður Ingi Jóhannsson, ráðherra sveitarstjórnarmála, hefur boðað átak í fækkun sveitarfélaga og talað fyrir því að jöfnunarsjóður verði notaður til þess að hvetja til sameininga næstu árin. Þorleifur styður slíkt útspil og telur raunar að það geti haft úrslitaáhrif á hvort af þessu verður. „Og við viljum sjá útlistun, eða hvernig það verður framkvæmt, áður en við tökum endanlega ákvörðun um kosningu,“ segir Þorleifur. 

Næsti fundur sameiningarnefndar verði líklega ekki haldinn fyrr en svör frá stjórnvöldum hafi borist. Þá fyrst verði hægt að huga að íbúakosningu. „Hún gæti í fyrsta lagi orðið seint í vor, eða seinni part næsta árs. Það er ekki ákveðið sko,“ segir Þorleifur.