Mynd:
Athugið þessi frétt er meira en 8 ára gömul.
Bærinn hættir að taka við hælisleitendum
Tillaga Árna Sigfússonar, bæjarstjóra Reykjanesbæjar, um að sveitarfélagið hætti að taka við hælisleitendum frá 1.apríl og að hælisleitendur verði ekki fleiri en fimmtíu í bænum eftir hálft ár, var samþykkt samhljóða í bæjarráði í gær.
Í tillögunni er vísað til greinar í samningi Reykjanesbæjar og Útlendingastofnunar þar sem segir að komi upp ófyrirsjáanlegar aðstæður, svo sem vegna mikillar fjölgunar hælisleitanda áskilja báðir sér rétt til að krefjast endurskoðunar á samninginum.
Í greinargerð, sem fylgir tillögunni, segir meðal annars að í dag séu 149 hælisleitendur á landinu. Það séu meira en tvöfalt fleiri en voru þegar samningurinn var gerður. Þá kemur einnig fram að frá síðustu áramótum hafi þeim fjölgað um 43 og ekkert lát sé á komu þeirra.
Í greinagerðinni segir einnig að Reykjanesbær hafi á síðustu vikum leitað að húsnæði á höfuðborgarsvæðinu og flutt rúmlega fjörtíu manns þangað. Það hafi skapað töluverða óhagræðingu fyrir einstaklinga og starfsfólk og sé ekki ákjósanlegt til lengri tíma. Þá sé fjöldi hælisleitanda orðinn mjög áberandi í samfélaginu í Reykjanesbæ og því sé erfitt um eðlilega samlögun, sem væri bæði íbúm og þeim sem eru í hælisleit fyrir bestu.
