„Atriðið er í raun búið til á undan laginu, erum ekki að fara að breyta laginu þannig að við breytum ekki atriðinu mikið. Stærra svið, fleiri myndavélar og ljós. Aðallega það sem við ætlum að skoða en hreyfingarnar hjá okkur verða nokkurn veginn þær sömu,“ bætti Daði við. Áhorfendur á laugardaginn tóku eflaust eftir því að Daði og Gagnamagnið lentu í vandræðum í seinni flutningi sínum áður en að lagið var stöðvað og þeim boðið að byrja upp á nýtt sökum tæknilegra vandamála. Þau segjast ekki vita nákvæmlega hvað gerðist. 

„Ég veit ekki beint hvað gerðist tæknilega en það var greinilega sama hljóð í salnum og sjónvarpinu en það var alls ekki það sama og við vorum með í eyranu. Við fylgdum bara því sem við vorum með í eyrunum, einhverju þurftum við að fylgja og ég er mjög feginn að hafa tekið ákvörðun um það heldur en að reyna að fylgja einhverju skrýtnu feedback út í sal því þar heyrist aðallega bassinn. Ég er mjög þakklátur að þetta hafi verið stoppað. Reyndar þegar ég horfði á þetta finnst mér pínu skrýtið að þetta hafi ekki verið stoppað fyrr því þetta var alveg stórskrýtið,“ sagði Daði um þessa tæknilegu örðugleika.

Árný og hinir dansararnir eru hins vegar ekki með neitt í eyrunum og þurfa því að reiða sig á hljóðið út í sal. Hún segist því strax hafa tekið eftir að eitthvað var að. „Það var mjög skrýtið að heyra söngvarana syngja á einhverri hraðspólun.“ Þrátt fyrir að forkeppninni sé nú lokið er nóg fram undan hjá hópnum. Felix segir að nú taki við fundarhöld og að skila öllum gögnum til Eurovision. Aðspurður sagði Felix að það verði að koma í ljós hvort COVID-19 geti sett strik í reikninginn. „Við bíðum bara róleg og sjáum hvað gerist, það er ekki verið að aflýsa viðburðum ennþá mikið í Evrópu þannig að við tökum bara eitt skref í einu í þessu og hlýðum þeim fyrirmælum sem við fáum.“