Alvarlegar sýkingar hjá börnum vegna e. coli

04.07.2019 - 12:19
Mynd með færslu
 Mynd:
Á undanförnum tveimur til þremur vikum hafa fjögur börn greinst á Íslandi með alvarlega sýkingu af völdum e. coli bakteríu. Ekki er ljóst hver uppspretta smitsins er. Bakterían getur valdið blóðugum niðurgangi og í alvarlegum tilvikum nýrnabilun og blóðleysi.

Þetta kemur fram á vef Landlæknis.

Matvælastofnun og heilbrigðiseftirlit Suðurlands vinna nú að því að greina uppruna sýkinganna og stöðva frekari útbreiðslu. 

Börnin búa öll á höfuðborgarsvæðinu en talið er að þau hafi smitast í uppsveitum Árnessýslu, nánar tiltekið í Bláskógabyggð. Fólk getur smitast með menguðum matvælum eða vatni eða með beinni snertingu við dýr eða mengaðan úrgang dýra, sem kemst um munn niður í meltingarveg. Þar framleiðir bakterían eiturefni sem getur valdið blóðugum niðurgangi og jafnvel nýrnabilun og blóðleysi.

Matvælastofnun greindi nýverið frá tilvist sjúkdómsvaldandi baktería í kjöti á markaði á Íslandi. Þar kom fram að í þriðjungi sýna úr íslensku lambakjöti fundust e. coli bakteríur og í 11,5 prósentum sýna af nautakjöti. Þá geta bakteríurnar fundist í ógerilsneyddri mjólk.

„Einstaklingar sem dvalist hafa undanfarnar 2–3 vikur í uppsveitum Árnessýslu (Bláskógabyggð) og veikjast með blóðugum niðurgangi eru hvattir til að leita til læknis svo ganga megi úr skugga um hvort þeir hafi sýkst af ofangreindri bakteríu,“ segir í tilkynningu frá Landlækni. 

Katrín Ásmundsdóttir
vefritstjórn
Síðast:
Þessi þáttur er í hlaðvarpi