Athugið þessi frétt er meira en 2 ára gömul.

Álagning Orkuveitunnar á vatnsgjaldi ólögmæt

23.04.2019 - 17:54
Mynd með færslu
 Mynd: Kristinn Þeyr Magnússon - RÚV
Álagning Orkuveitu Reykjavíkur á vatnsgjaldi ársins 2016 var ólögmæt. Þetta er niðurstaða samgöngu- og sveitarstjórnarráðuneytisins. Ráðuneytið hyggst taka til skoðunar gjaldskrár vatnsveitna allra sveitarfélaga í kjölfar úrskurðarins.

19. febrúar barst ráðuneytinu stjórnsýsluákæra vegna álagningar Orkuveitu Reykjavíkur á vatnsgjaldi ársins 2016. Þess var krafist að álagning Orkuveitunnar á vatnsgjaldi yrði felld úr gildi og viðurkennt að Orkuveitunni bæri að endurgreiða kæranda oftekin vatnsgjöld. Góð afkoma OR vakti athygli úttektarnefndar. Samkvæmt lögum eiga þeir fjármunir sem verða til við rekstur vatnsveitu að fara til frekar uppbyggingar á vatnsveitunni og er réttur til arðtöku af rekstrinum takmarkaður. 

Í úrskurði ráðuneytisins segir að með hliðsjón af 10. gr. laga um vatnsveitur sveitarfélaga, sé með öllu óheimilt í gjaldskrá að ákveða hærra gjald en nemur meðalkostnaði af því að veita þjónustuna. Þar komi skýrt fram að vatnsgjald, ásamt öðrum tekjum vatnsveitu, skuli aðeins standa undir rekstri vatnsveitunnar.

Undir það falli einnig fjármagnskostnaður, fyrirhugaður stofnkostnaður samkvæmt langtímaáætlun veitunnar og kostnaður við að tryggja nægilegt vatn til slökkvistarfs og fyrir sérstakan slökkvibúnað í samræmi við skyldur veitunnar. Í lögum eða reglugerð sé aftur á móti hvergi að finna ákvæði sem heimili að tekinn sé arður af starfsemi vatnsveitu. 

Í úrskurðinum kemur jafnframt fram að miðað við fyrirliggjandi gögn og umsögn Orkuveitunnar telji ráðuneytið ljóst að arðsemi fyrirtækisins umfram fjármagnskostnað sé að lágmarki um tvö prósent. Ákvæði gjaldskrár Orkuveitunnar vegna álagningar ársins 2016 væru að þessu leyti í andstöðu við ákvæði laga um vatnsveitur sveitarfélaga. Loks gefi fyrirliggjandi gögn til kynna að Orkuveitan hafi á undanförnum árum haft umtalsverðan arð af starfsemi sinni og svo verði áfram samkvæmt fjárhagsáætlun fyrir árin 2017-20121. 

solveigk's picture
Sólveig Klara Ragnarsdóttir
Fréttastofa RÚV