Ákærður fyrir brot gegn 4 fötluðum konum

23.08.2019 - 11:44
Mynd með færslu
 Mynd: ©Þórgunnur Oddsdóttir
55 ára gamall karlmaður, sem hefur verið úrskurðaður í nálgunarbann gagnvart konu og barnungri dóttur hennar, hefur verið ákærður fyrir kynferðisbrot gegn fjórum fötluðum konum. Konurnar krefjast þess að maðurinn verði dæmdur til að greiða sér samtals tíu milljónir í miskabætur. Maðurinn hafði tólf þúsund krónur af einni konunni og laug því að annarri að hann vildi trúlofast henni.

Ákæran gegn manninum var þingfest í Héraðsdómi Reykjavíkur í morgun. Samkvæmt upplýsingum fréttastofu sætti maðurinn aldrei gæsluvarðhaldi en rannsókn málsins var bæði flókin og umfangsmikil.  Var það meðal annars sent tvívegis til lögreglunnar á höfuðborgarsvæðinu til framhaldsrannsóknar.

Það skýrir að sum brotanna eru um fimm ára gömul. Manninum er meðal annars gefið að sök að hafa brotið fjórum sinnum gegn einni konunni frá því í lok árs 2014 til byrjun árs 2015, þar af tvívegis á gólfi salernis við Holtagarða.

Héraðssaksóknari segir í ákærunni að maðurinn hafi beitt konuna ólögmætri nauðung og nýtt sér yfirburði sína og aðstöðumun. Þá hafi honum verið kunnugt um fötlun konunnar vegna tengsla sinna við hana.  Maðurinn er einnig ákærður fyrir að hafa haft af henni 12 þúsund krónur sem hann fékk hana til að taka út úr hraðbanka.

Maðurinn er einnig ákærður fyrir kynferðisbrot, blygðunarsemisbrot og hótanir gagnvart annarri konu sem samkvæmt ákæru saksóknara er þroskahömluð.  Hann er sagður hafa beitt hana blekkingum um það hver hann væri og síðan hvers eðlis samband þeirra væri í gegnum samskiptaforritið Messenger í þeim tilgangi að eiga í kynferðislegum samskiptum við hana. Þá fékk hann konuna til að senda sér kynferðislegar myndir og hótaði síðan að birta þær. Í ákærunni kemur meðal annars fram að maðurinn hafi talið konunni trú um að hann vildi trúlofast henni og nýtt sér yfirburði sína og aðstöðumun til að brjóta gegn henni kynferðislega.

Maðurinn er síðan sagður hafa brotið kynferðislega gegn tveimur þroskahömluðum konum í bíl í Norðlingaholti. Saksóknari segir að konurnar hafi ekki skilið þýðingu verknaðarins vegna fötlunar sinnar og að manninum hafi verið kunnugt um hana vegna tengsla sinna við þær. Hann er síðan sagður hafa brotið ítrekað gegn annarri þeirra á heimili sínu.

Honum er jafnframt gefið að sök hafa beitt hana blekkingum, meðal annars hafi hann lofað henni peningagreiðslum og hótað að drepa sig í þeim tilgangi að fá hana til að senda sér nektarmyndir. Konurnar fjórar krefja manninn um samtals 10 milljónir króna í miskabætur.

Landsréttur staðfesti í vikunni nálgunarbann yfir manninum gagnvart fimmtu konunni og barnungri dóttur hennar.  Þar kemur fram að maðurinn sé undir rökstuddum grun um kynferðis-og ofbeldisbrot, hótanir, áreitni og ónæði. 

freyrgigja's picture
Freyr Gígja Gunnarsson
Fréttastofa RÚV
Síðast:
Þessi þáttur er í hlaðvarpi