Mynd: Unsplash
Athugið þessi frétt er meira en 3 ára gömul.
Ákærð fyrir að vinna á kaffihúsi á Hvammstanga
Tuttugu og sex ára gömul úkraínsk kona hefur verið ákærð fyrir brot á lögum um atvinnuréttindi útlendinga. Hún réð sig til starfa á kaffihúsinu Hlöðunni á Hvammstanga án þess að hafa atvinnuleyfi á Íslandi. Hún starfaði hjá fyrirtækinu frá 8. eða 9. maí síðastliðinn og var enn starfandi þar þegar lögregla tók skýrslu af henni 21. maí.
Í ákæru er þess krafist að konan verði dæmd til refsingar og til að greiða sakarkostnað. Ákæran var birt í Lögbirtingablaðinu í gær. Í fyrirkalli kemur fram að ef ákærða sækir ekki dómþing megi hún búast við því að fjarvist hennar verði metin til jafns við það að hún viðurkenni að hafa framið brot það sem hún er ákærð fyrir og dómur verði lagður á málið að henni fjarstaddri.
Samkvæmt lögum um atvinnuréttindi útlendinga má konan eiga von á sektum eða fangelsi allt að sex mánuðum.
