„Ætla ekki að taka þátt í þessari sýningu“

16.01.2019 - 10:46
Mynd með færslu
 Mynd:
Gunnar Bragi Sveinsson og Sigmundur Davíð Gunnlaugsson mæta ekki fyrir stjórnskipunar- og eftirlitsnefnd Alþingis. Þeir sendu Helgu Völu Helgadóttur, formanni nefndarinnar, yfirlýsingar sem hún las í upphafi fundarins sem hófst klukkan 10:30. Fundurinn er í beinni útsendingu í spilaranum hér að neðan.

Gunnar Bragi Sveinsson sagði í sinni yfirlýsingu að hann ætli ekki að „taka þátt í þessari sýningu“. Til fundarins hafi verið boðað í annarlegum tilgangi og vegna þess þá telur Gunnar Bragi að hann þurfi ekki að mæta. Hann telur að ekki eigi að ræða um málið á hlutlægan hátt.

Sigmundur Davíð Gunnlaugsson segir í sinni yfirlýsingu að það sé óforsvaranlegt að formaður nefndarinnar haldi fund til að draga ályktanir af „illa sundur klipptum hljóðupptökum af veitingastofuspjalli sem aflað var með refsiverðum aðferðum.“ Hann segir að ógjörningur sé að komast að því hvað hafi verið klipp úr samtalinu á Klausturbarnum, hvað hafi verið soðið saman og hvernig staðið hafi verið að brotinu.

„Það er því enginn siðferðislegur grundvöllur fyrir þeirri umræðu sem formaður stjórnskipunar- og eftirlitsnefndar boðar til,“ segir í yfirlýsingu Sigmundar Davíðs.

Bein útsending frá nefndarsviði Alþingis

 

Stjórnskipunar- og eftirlitsnefnd fundar um „skipan sendiherra“ á opnum fundi í dag. Tilefnið eru yfirlýsingar Gunnars Braga Sveinssonar, fyrrverandi utanríkisráðherra, um loforð um sendiherrastöður sem heyrast á Klausturupptökunum.

Reynt var að halda þennan fund fyrir jól án árangurs. Ástæðan var að hvorki Gunnar Bragi Sveinsson né Sigmundur Davíð Gunnlaugsson, þingmenn Miðflokksins og fyrrverandi ráðherrar, höfðu svarað fundarboði nefndarinnar.

Bæði Bjarni Benediktsson fjármálaráðherra og formaður Sjálfstæðisflokksins og Guðlaugur Þór Þórðarson utanríkisráðherra hafa staðfest komu sína á fundinn í dag. Sigmundur Davíð Gunnlaugsson og Gunnar Bragi Sveinsson eru einnig boðaðir á fundinn en þeir hafa ekki staðfest komu sína.

Bein útsending verður frá fundinum sem hefst klukkan 10:30.

Gunnar Bragi og Sigmundur Davíð sátu á Klausturbarnum í lok nóvember þar sem gerð var upptaka af samtali þeirra og fjögurra annarra þingmanna. Þar má heyra Gunnar Braga segja frá loforði sem hann tók af Bjarna, formanni Sjálfstæðisflokksins, um að Gunnar Bragi myndi sjálfur fá sendiherrastöðu ef hann myndi skipa Geir H. Haarde, fyrrverandi forsætisráðherra og formann Sjálfstæðisflokksins, sem sendiherra.

Geir var skipaður sendiherra Íslands í Bandaríkjunum í utanríkisráðherratíð Gunnars Braga árið 2014. Á sama tíma var Árni Þór Gunnarsson, þáverandi þingmaður Vinstri grænna, skipaður sendiherra. Gunnar Bragi heyrist stæra sig af þessari ákvörðun á upptökunum. Með þessum hætti hafi hann gagngert leitt athyglina frá skipan Geirs.

Á upptökunum heyrist Sigmundur Davíð staðfesta þessa frásögn Gunnars Braga. Eftir að upptökurnar voru gerðar opinberar hafa þeir þvertekið fyrir að sagan um loforðið hafi verið sönn. Bjarni Benediktsson hefur jafnframt neitað því að hafa veitt slíkt loforð og Guðlaugur Þór segist ekki vita til þess að til stæði að gera Gunnar Braga að sendiherra.

 

birgirthh's picture
Birgir Þór Harðarson
Fréttastofa RÚV
Síðast:
Þessi þáttur er í hlaðvarpi