Ætla ekki að svipta Procar starfsleyfi

04.06.2019 - 18:28
Mynd með færslu
 Mynd:
Samgöngustofa ætlar ekki að svipta bílaleiguna Procar starfsleyfi. Tillögur fyrirtækisins að úrbótum voru taldar fullnægjandi. Lögreglurannsókn á málinu er komin til héraðssaksóknara vegna umfangs.

Fréttaskýringaþátturinn Kveikur upplýsti um umfangsmikið svindl bílaleigunnar Procar í febrúar. Gögn sýndu að átt hefði verið við kílómetrastöðu bíla áður en þeir voru seldir á að minnsta kosti fimm ára tímabili. Procar gekkst við brotunum og hét því að bjóða þeim bætur sem voru blekktir.   

Málið er nú komið á borð héraðssaksóknara vegna umfangs, að sögn lögreglunnar á höfuðborgarsvæðinu. 

Síðan málið kom upp hefur viðbragðsleysi vegna þess verið gagnrýnt en það heyrir undir Samgöngustofu. Í fréttum RÚV í lok apríl sagði Þórólfur Árnason, forstjóri stofnunarinnar að reyndust brotin jafn alvarleg og þau litu út fyrir að vera, yrði gripið til leyfissviptingar.

„Við höfum farið í það að sjá með hvaða hætti við getum þrengt eða jafnvel tekið það af í einstaka tilvikum og höfum meðal annars átt fund með ákveðnum rekstraraðilum og við gætum stjórnsýslulaga og það er andmælaréttur hjá viðkomandi aðilum og við förum rétt og óskum eftir skýringum og eftir atvikum getur það endað með leyfissviptingu,“ sagði Þórólfur í samtali við fréttastofu í lok apríl.

Samgöngustofa upplýsti forsvarsmenn Procar um niðurstöðu sína í málinu í byrjun maí. Gestur Gunnarsson, lögmaður hjá Draupni sem fer með mál Procar, segir að Samgöngustofa telji tillögur bílaleigunnar um úrbætur fullnægjandi og því verði ekki aðhafst frekar í þessu máli að svo stöddu. 

Gestur segir að það sem Procar hafi gert utan þess að bjóða fólki bætur sé að framvísa aksturssögu til kaupenda og taka upp verklagsreglur til að tryggja að mál sem þetta komi ekki upp aftur og að lögum sé fylgt. Bæturnar byggjast á niðurstöðu óháðs matsmanns sem var fenginn til að meta tjón af því að átt hefði verið við akstursmæla.

holmfridurdf's picture
Hólmfríður Dagný Friðjónsdóttir
Fréttastofa RÚV
Síðast:
Þessi þáttur er í hlaðvarpi