Aðeins Stalín hefur verið lengur við völd

19.03.2018 - 13:28
epa06613469 Russia's President Vladimir Putin delivers a speech during a rally in his support near Kremlin in Moscow, Russia, 18 March 2018. Russians are electing the President of Russia in the 18 March elections, with eight candidates contesting for
 Mynd: EPA-EFE - EPA
Xi Jinping forseti Kína hefur óskað Vladimír Putin til hamingju með yfirburða sigur í forsetakosningunum í Rússlandi í gær. Enginn leiðtogi á Vesturlöndum hafði í morgun óskað sigurvegaranum til hamingju. Þegar nærri öll atkvæði höfðu verið talin hafði Pútín hlotið yfir 76 prósent þeirra. Sigurinn framlengir valdatíð Pútíns um sex ár í nær 25 ár. Einungis Jósep Stalín hefur verið lengur við völd í Rússlandi á síðari tímum.  

Pútín  sem hefur ríkt í Rússlandi sem annaðhvort forseti eða forsætisráðherra frá árinu 1999 er nú ekkert að vanbúnaði að hefja sitt fjórða kjörtímabil sem forseti.  Pútín var kynntur sem sigurvegari á fjöldafundi í Moskvu eftir að úrslit voru kunn.

Pútín sagði meðal annars í ávarpi sínu að mikilvægt væri að halda einingu Rússlands og halda fram á við. Sameinaðir gætu Rússar tekist á við verkefni framtíðarinnar í nafni Rússlands.
 
Pútín sagði að kjósendur hefðu með því að kjósa hann til áframhaldandi setu á forsetastóli verið að bregðast við árangri sem náðst hefði á síðustu árum. Hann svaraði ekki spurningu fréttamanna um hvort hann ætlaði aftur að bjóða sig fram til forseta að sex árum liðnum. Hann sagði spurninguna fyndna og spurði á móti hvort menn héldu að hann ætlaði að vera forseti Rússlands þar hann yrði hundrað ára gamall.

Helsti leiðtogi stjórnarnastöðunnar Alexei Navalny, sem gagnrýnt hefur spillingu Pútíns og stjórnarliðs hans, var meinað að bjóða sig fram þar sem hann hafði hlotið dóm sem hann segir að hafi verið af pólitískum rótum runninn. 
 

 

 

Þorvaldur Friðriksson
Fréttastofa RÚV
Síðast:
Þessi þáttur er í hlaðvarpi