Mynd: Roar Aagestad
Aðeins höfuðið stóð upp úr öldunum
Nokkrir menn stofnuðu sér í hættu í Reynisfjöru í gær þegar þeir gengu niður í flæðarmálið þar sem öldurnar brotnuðu á fjörunni. Eins og sjá má á myndum sem fylgja fréttinni áttu mennirnir fótum fjör að launa. Ekki mátti þó miklu muna að illa færi. Einn mannanna missti fótanna og á tímabili stóð aðeins höfuð hans upp úr öldunum. Hann náði þó að komast á fætur og upp í fjöruna áður en aldan sogaði hann út.
Mynd: Roar Aagestad
Roar Aagestad átti leið um þegar mennirnir lentu í hættu í fjörunni og náði myndum af atvikinu. Hann segir að mennirnir hafi allir komist á þurrt en holdvotir. Roar telur að einstök heppni hafi ráðið því að maðurinn sem féll í fjörunni hafi ekki sogast út með kraftmiklum öldunum.
Mynd: Roar Aagestad
Roar segir að ekki hafi fleiri lent í hættu á þessum tíma. Hann kveður glæfralegt að sjá fólk sæta lags og fara framfyrir stuðlabergsklettinn inn í víkina þegar sjórinn skellur á landinu af miklum krafti. Straumurinn sé afar sterkur þegar öldurnar brotna í flæðarmálinu og renna aftur til sjávar.
Mynd: Roar Aagestad
Algengt er að fólk stofni sér og sínum í hættu í Reynisfjöru. Aðeins er liðin rúm vika síðan leiðsögumaður bjargaði tveimur börnum úr lífsháska í Reynisfjöru. Hann sá hjón með tvö ung börn í fjörunni og hugðist kalla varnaðarorð til þeirra. Áður en tími gast til þess kom stór alda og gleypti börnin. Leiðsögumaðurinn hljóp af stað og náði að koma báðum börnunum til bjargar.
Tvö banaslys urðu í sjónum við Reynisfjöru, árið 2007 og 2016. Erlend kona lést af völdum höfuðáverka eftir fall á göngustíg við fjöruna árið 2018.
Leiðrétt: Fjöldi banaslysa hefur verið leiðréttur.
Mynd: Roar Aagestad
