Athugið þessi frétt er meira en mánaðargömul.

93% skjólstæðinga Kvennaathvarfs sættu andlegu ofbeldi

11.02.2020 - 03:51
Kvennaathvarfið bæklingur 2016
 Mynd: RÚV
93 prósent kvenna sem leituðu skjóls og ráðgjafar í Kvennaathvarfinu í fyrra voru beitt andlegu ofbeldi og sex af hverjum tíu höfðu mátt þola líkamlegt ofbeldi. Þetta kemur fram í yfirliti Samtaka um kvennaathvarf um starfsemi athvarfsins 2019. 144 konur og 100 börn dvöldu í Kvennaathvarfinu um lengri eða skemmri tíma í fyrra, og 294 konur til viðbótar komu þangað í samtals 545 viðtöl.

Aðspurðar um ástæður þess að þær leituðu hjálpar nefndu flestar konurnar fleiri en eina ástæðu. Nær allar konurnar, eða 93 prósent þeirra, sögðust hafa verið beittar andlegu ofbeldi. 60 prósent urðu fyrir líkamlegu ofbeldi og rúmur helmingur, 54 prósent, sagðist hafa óttast um líf sitt einhverntímann í sambandi sínu við ofbeldismanninn. Nær helmingur kvennanna var beittur fjárhagslegu ofbeldi.

Þá nefndi ríflega þriðjungur kvennanna kynferðislegt ofbeldi og ofbeldi gegn börnum. Einni af hverjum fjórum konum sem leituðu til Kvennaathvarfsins hafði verið hótað lífláti og jafnmargar verið teknar kyrkingartaki. Ein af hverjum fimm mátti þola stafrænt ofbeldi og sextán prósent kvennanna voru ofsótt af eltihrelli. Gerendur voru í 95 prósentum tilfella karlmenn, langflestir íslenskir. 

Ævar Örn Jósepsson
Fréttastofa RÚV