Mynd: EPA
3,2 tonn af fílabeini falin innan um marmara
Yfirvöld í Kambódíu lögðu í vikunni hald á 3.2 tonn af fílabeini sem falin voru í gámi sem sendur var til landsins frá Mósambík. Yfirmaður hjá kambódíska tollinum staðfesti þetta við AFP-fréttastofuna í dag. Þetta mun vera mesta magn fílabeins sem fundist hefur á einu bretti í Kambódíu. Samtals fundust 1.026 fílstennur í gámnum, sem var á geymslusvæði Pnom Penh-hafnar, faldar innan um marmara.
Samkvæmt Sun Chay, yfirmanni tollstöðvarinnar við höfnina, fannst fílabeinið á fimmtudaginn eftir ábendingu frá bandaríska sendiráðinu. Skoðun leiddi í ljós að gámurinn kom til Kambódíu frá Mósambík á síðasta ári, en af einhverjum ástæðum hefur enginn vitjað hans. Samkvæmt frétt AFP er Kambódía orðin ein helsta miðstöð þeirra sem smygla og versla með ólöglegar dýraafurðir á borð við fílabein, dýr í útrýmingarhættu og afurðir af þeim.
Ekki hefur tekist að finna út úr því, hver eða hverjir það voru, sem guggnuðu á því að sækja þessa stóru fílabeinssendingu.
