Mynd: RÚV - Freyr Arnarson / Karl New - RÚV
22 umsóknir borist Þjóðskrá um skráningu kyns
22 umsóknir um breytingu á skráningu kyns, og samhliða því beiðni um nafnbreytingu, hafa borist Þjóðskrá Íslands frá því að ný lög um kynrænt sjálfræði tóku gildi. Tíu óska eftir því að breyta skráningu sinni úr karlkyni í kvenkyn og tólf úr kvenkyni í karlkyn. Enn er þó ekki hægt að skrá kyn sitt hlutlaust, líkt og lögin gera ráð fyrir.
Margrét Hauksdóttir, forstjóri Þjóðskrár, segir að þrettán af umsóknunum hafi þegar verið afgreiddar. Þá sé vinnslu sjö umsókna að ljúka.
Sjö umsóknir um breytingu nafns
Auk þess hafi samtals sjö umsóknir borist þar sem óskað er eftir því að breyta aðeins nafni og taka upp nafn sem hefur hingað til hefur tilheyrt gagnstæðu kyni í lögum.
Búið er að afgreiða þær flestar. Meðal annars hefur verið fjallað um Sigríði bónda sem breytti nafni sínu úr Sigurður í Sigríður og fékk loks að heita í höfuðið á ömmu sinni.
Enn ekki fengist fjármagn í breytingar á kerfum Þjóðskrár
Hlutleysisskráningar stranda enn á fjármögnun. Þjóðskrá hefur ekki verið tryggt fjármagn til breytinga sem þarf að gera á kerfum svo hægt verði að afgreiða slíkar umsóknir.
Þær upplýsingar fengust hjá samgöngu- og sveitastjórnarráðuneytinu að enn væri til skoðunar hvaðan fé til þess kæmi. Ráðuneytið, ásamt forsætisráðuneytinu, á að tryggja stofnuninni nauðsynlegt fjármagn til verksins. Þjóðskrá hefur 18 mánuði frá gildistöku laganna til að koma þessu í lag.
Óljóst hvort foreldrar geti skráð kyn nýbura hlutlaust
Foreldrar hafa velt fyrir sér hvort mögulegt sé að skrá kyn barns síns hlutlaust við fæðingu, það er hvorki sem stúlku né dreng. Margrét segir að ekki sé skýrt kveðið á um heimild foreldra til að skrá barn sitt kynhlutlaust við fæðingu í nýju lögunum. Því sé enn óljóst hvort það sé hægt hér á landi.
Þær upplýsingar fengust frá Landspítalanum að kyngreining fari þannig fram hér á landi að ytri kynfæri séu skoðuð og kyn skráð samkvæmt því, eins og hafi alltaf verið venjan.
