Athugið þessi frétt er meira en 3 mánaða gömul.

Musk orðinn eigandi Twitter og búinn að reka yfirmenn

FILE - Tesla and SpaceX Chief Executive Officer Elon Musk speaks at the SATELLITE Conference and Exhibition in Washington on March 9, 2020.  Musk said Saturday, Aug. 6, 2022, his planned $44 billion takeover of Twitter should move forward if the company can confirm some details about how it measures whether user accounts are ‘spam bots’ or real people. (AP Photo/Susan Walsh, File)
Elon Musk, eigandi Twitter. Mynd: AP
„Fuglinn er frjáls!“ skrifaði auðkýfingurinn Elon Musk í færslu á Twitter eftir að kaup hans á samfélagsmiðlarisanum gengu formlega í gegn á fimmtudagskvöld, degi áður en lokafrestur til þess rann út. Nokkrir helstu stjórnendur fyrirtækisins voru reknir úr stöðum sínum um leið og kaupin voru staðfest, þar á meðal forstjórinn Parag Agrawal, og var þeim gert að yfirgefa höfuðstöðvar þess tafarlaust í fylgd öryggisvarða. Bandarískir fjölmiðlar greina frá þessu.

Musk og stjórn Twitter hafa mánuðum saman tekist á um vanefndir hins fyrrnefnda á 44 milljarða dala bindandi kauptilboði hans í fyrirtækið, sem hann vildi rifta. Stjórn fyrirtækisins leitaði til dómstóls, sem úrskurðaði að Musk yrði að standa við samninginn og yfirtaka Twitter ekki síðar en í dag, föstudag.

Musk, sem er talinn auðugasti maður heims, á fyrir Tesla-bílaverksmiðjurnar og geimferðafyrirtækið Space-X. Twitter er einn mest notaði og áhrifamesti samfélagsmiðill samtímans og í frétt Washington Post segir að brottrekstur yfirmannanna sé til marks um að Musk ætli að standa við stóru orðin og gera róttækar breytingar á fyrirtækinu.

Vill slaka á eftirliti með skrifum notenda og reka meirihluta starfsfólks

Hann hafði lengi gagnrýnt nýrekna stjórnendur þess fyrir stefnu í markaðssetningu miðilsins og sakað þá um ritskoðunartilburði með því að úthýsa notendum sem dreifa hatursáróðri og falsfréttum. Musk lýsti því meðal annars yfir að hann myndi sjá til þess að Donald Trump, fyrrverandi Bandaríkjaforseti, fengi að nýta sér miðilinn á ný, en hann var gerður útlægur af Twitter fyrir að dreifa falsfréttum. 

Í færslu á Twitter í gær skrifað hinn nýi eigandi þó að „Twitter [megi] augljóslega ekki verða eitt galopið allsherjar horngrýti þar sem hægt er að segja hvað sem er án þess að það hafi nokkrar afleiðingar!“

Þá hefur hann sagt mögulegum fjárfestum að hann ætli sér að bæta afkomu fyrirtækisins verulega, meðal annars með því að reka allt að 75 prósent starfsfólks fyrirtækisins, ef og þegar hann eignaðist það.