Brottrækur leyniþjónustuforstjóri lætur gamminn geisa

Findsen var vikið frá störfum tímabundið árið 2020 meðan fram fór úttekt á grunsemdum um að leyniþjónusta danska hersins hefði stundað ólöglegt eftirlit innan Danmerkur. Stofnunin á aðeins að fylgjast með erlendri ógn.

Findsen segir hins vegar að dómsmálaráðherra landsins, Trine Bramsen, hafi gefið það í skyn á fundi þeirra að ríkisstjórnin þyrfti að geta „talið upp í 90“ – þ.e. tryggt sér áframhaldandi stuðning minnst 90 þingmanna, en það er sá fjöldi sem þarf fyrir meirihluta á danska þinginu, þar sem 179 þingmenn sitja. 

Allt kemur þetta fram í bók sem Findsen gaf út í dag og nefnist Leyniþjónustuforstjórinn – endurminningar úr klefa 18 (Spionchefen – erindringer fra celle 18). Bókin var skrifuð á meðan Findsen sat í gæsluvarðhaldi um tveggja mánaða skeið frá því í desember fram í febrúar á þessu ári.

Gæsluvarðhaldið hafði þó ekkert með meintar njósnir á dönskum borgurum að gera; því máli hafði lokið með því að rannsóknarnefnd hreinsaði leyniþjónustuna af öllum sökum.

Það sem hangir yfir Findsen þessa dagana og er ástæða þess að hann sætti gæsluvarðhaldi fyrr á árinu, er ákæra fyrir að hafa lekið ríkisleyndarmálum til móður sinnar, kærustu og fleiri. Fjallað var um málaferlin gegn Findsen í Speglinum í síðasta mánuði.

• Sjá einnig: Ríkisleyndarmálin sem enginn veit hver eru

Sakar skrifstofustjórann um að hagræða sannleikanum

Síðustu misserin, meðan Findsen var í leyfi frá störfum, hafði hvert fréttamálið um málefni leyniþjónustunnar rekið annað og upplýsingar, sem ekki voru alltaf stjórnvöldum þóknanlegar, ratað í fjölmiðla. Spjótin beindust fljótt að Findsen.

Í bókinni rekur Findsen til að mynda fundi sem hann sat með Barböru Bertelsen, skrifstofustjóra í forsætisráðuneytinu, og fleiri embættismönnum og segir erindi fundarins hafa verið að samræma upplýsingagjöf vegna tiltekins máls.

„Ég upplifði að Barbara Bertelsen vildi setja upplýsingarnar fram á þann hátt að dómsmálaráðuneytið kæmi sem best út,“ sagði hann. Staðreyndir hafi skipt minna máli.

Þótt hann nefni ekki málið sem um ræðir – hann segist bundinn trúnaði – þykjast danskir miðlar sannfærðir um að fundurinn hafi fjallað um stórfurðulegt mál Ahmed Samsams.

Fjölmiðlar opinberuðu það í fyrra að Samsam, sem hafði verið dæmdur í átta ára fangelsi á Spáni fyrir að tilheyra hryðjuverkasamtökunum Íslamska ríkinu – hann hefði í raun verið sendur þangað á vegum leyniþjónustu danska hersins, með fé og tiltekið verkefni. Þess má geta að Samsam afplánar enn dóminn, í dönsku fangelsi.

Sennilega er enginn skrifstofustjóri í forsætisráðuneyti þekktari í heimalandi sínu en Barbara Bertelsen, en hún lék lykilhlutverk í minkamálinu í Danmörku þegar tekin var ákvörðun um að slátra öllum dönskum minkum án þess að fyrir því væri lagaheimild. Fékk hún bágt fyrir í rannsóknarskýrslu danska þingsins.