Athugið þessi frétt er meira en 2 mánaða gömul.

Fara fram á gæsluvarðhald yfir þremur af fjórum

03.10.2022 - 17:29
Mynd: RÚV / RÚV
Lögreglan á Norðurlandi eystra ætlar að fara fram á gæsluvarðhald yfir þremur þeirra fjögurra sem handtekin voru í Ólafsfirði í morgun.

Þetta staðfestir Arnfríður Gígja Arngrímsdóttir aðstoðaryfirlögregluþjónn hjá rannsóknardeild Lögreglunnar á Norðurlandi eystra. 

Lögregla handtók fjóra vegna manndráps í heimahúsi í Ólafsfirði í morgun. Karlmaður á fimmtugsaldri var stunginn með eggvopni en hann var gestkomandi í húsinu.

Endurlífgunartilraunir báru ekki árangur og var maðurinn úrskurðaður látinn á vettvangi.

Arnfríður segir lögreglu vera með nokkuð skýra mynd af því sem átti sér stað, en rannsókn sé þó enn á frumstigi og verið sé að afla gagna til að skýra þá mynd enn frekar. 

Íbúar í bænum eru harmi slegnir. Viðbragðsteymi Rauða krossins býður fram aðstoð sína og kyrrðarstund verður í Ólafsfjarðarkirkju í kvöld.