Athugið þessi frétt er meira en 4 mánaða gömul.

Herforingjar steyptu herforingjastjórn af stóli

01.10.2022 - 00:48
In this image from video broadcast by RTB state television, coup spokesman Capt. Kiswendsida Farouk Azaria Sorgho reads a statement in a studio in Ougadougou, Burkina Faso, on Friday evening, Sept. 30, 2022. Members of Burkina Faso's army seized control of state television late Friday, declaring that the country's coup leader-turned-president, Lt. Col. Paul Henri Sandaogo Damiba, had been overthrown after only nine months in power. The statement announced that Capt. Ibrahim Traore is the new military leader of Burkina Faso, a volatile West African country that is battling a mounting Islamic insurgency. (RTB via AP)
 Mynd: AP
Herforingjar í Búrkína Fasó steyptu ofurstanum Paul-Henri Sandaogo Damiba af stóli í dag, en hann fór fyrir valdaráni hersins í janúar síðastliðnum og hefur verið æðsti maður herforingjastjórnarinnar og sjálfskipaður forseti landsins allar götur síðan. Í yfirlýsingu sem flutt var í sjónvarpi tilkynntu fyrrum samherjar Damibas að hann hefði verið settur af og að höfuðsmaðurinn Ibrahim Traore væri tekinn við sem leiðtogi herforingjastjórnarinnar.

Í sömu yfirlýsingu greindu hermennirnir frá því að landamærum landsins yrði lokað á miðnætti, stjórnarskráin felld úr gildi og ríkisstjórn Damibas leyst upp.

Sömu ástæður og fyrir síðasta valdaráni

Rúmlega 20 einkennisklæddir hermenn mættu í myndver ríkissjónvarpsins í höfuðborginni Ouagadougou um áttaleytið að kvöldi föstudags að staðartíma og greindu frá valdatökunni.

Talsmaður hermannanna sagði þá ákveðna í að axla sína ábyrgð, með eitt skýrt markmið að leiðarljósi: Að tryggja öryggi þjóðarinnar og landamæri landsins á ný. Þetta eru sömu ástæður og Damiba tíndi til fyrir valdaráni sínu í janúar.

Átök hófust að morgni föstudags en engar fréttir af mannfalli

Skothvellir heyrðust nærri forsetahöllinni í höfuðborginni og við höfuðstöðvar herforingjastjórnarinnar að morgni föstudags, samkvæmt heimildum AFP-fréttastofunnar. Óljósar fréttir bárust af deilum um launagreiðslur til hermanna og að Damiba ætti í viðræðum við uppreisnarmenn.

Útsendingar ríkissjónvarpsins lágu niðri í nokkrar klukkustundir áður en tilkynningu hinna nýju stjórnarherra var sjónvarpað. Fréttir hafa ekki borist af mannfalli enn sem komið er.

Ekkert hefur miðað í átökunum við íslamista

Þegar Damiba og samherjar hans rændu völdum í janúar réttlættu þeir það með getuleysi stjórnvalda í baráttunni við vígasveitir öfga-íslamista sem haldið hafa landinu í blóðugum heljargreipum frá árinu 2015.

Damiba, sem sjálfur hefur mikla reynslu af vígvellinum og bardögum við þessar vígasveitir, sagði fyrri ríkisstjórn ekki sjá hernum fyrir þeim fjármunum, hergögnum og mannskap sem þyrfti til að binda enda á vargöldina í landinu, og hét algjörum viðsnúningi.

Það hefur ekki gengið eftir og um 40 prósent landsins eru enn nánast á valdi vígasveitanna, sem hafa ýmist tengsl við al Kaída eða Íslamska ríkið. Þær halda áfram grimmilegum og mannskæðum árásum sínum á óbreytta borgara jafnt sem hermenn.

Á annað hundrað manns hafa fallið í slíkum árásum bara í september. Aðbúnaður og útbúnaður hersins hafa lítið skánað og óánægjan hélt því áfram að krauma þar til upp úr sauð í dag, öðru sinni á þessu ári.