Athugið þessi frétt er meira en 4 mánaða gömul.

Evrópuleiðtogar leita eftir orku við Persaflóa

epa10202984 The Liquid Natural Gas (LNG) Terminal on the islet of Revithoussa, Greece, 21 September 2022 (issued 24 September 2022). The Revithoussa station is one of three sources supplying the National Natural Gas Transmission System, and one of the key energy infrastructures of Greece. The terminal’s three tanks have a total storage capacity of 225,000 m3 LNG, with a regasification rate of 1400 m3/h.  EPA-EFE/ORESTIS PANAGIOTOU
 Mynd: EPA-EFE - ANA-MPA
Evrópuríki leita í meira mæli til Miðausturlanda til þess að vinna bug á orkukrísunni sem framundan er í vetur. Franska orkufyrirtækið TotalEnergies fjárfesti í morgun í náttúrugasframleiðslu í Katar, og Þýskalandskanslari freistar þess að ná samningum á ferðalagi sínu um ríki Persaflóa um helgina.

Orkumálaráðherra Katars, Saad Sherida Al-Kaabi, sagði á blaðamannafundi í morgun að TotalEnergies ætli að taka þátt í stækkun einnar orkulindar Katars. Fjárfestingin nemur einum og hálfum milljarði bandaríkjadala. Franski orkurisinn gerði einnig samkomulag við Katar í sumar um 2,5 milljarða bandaríkjadala fjárfestingu í náttúrugasframleiðslu landsins.

Olaf Scholz, kanslari Þýskalands, flýgur til Sádi Arabíu í dag þar sem hann hefur tveggja daga ferðalag sitt á svæðinu. Hann heldur til fundar við krónprinsinn Mohammed bin Salman í Jeddah í dag, og heldur þaðan til Sameinuðu arabísku furstadæmanna og Katars. Tilgangur ferðarinnar er að tryggja Þjóðverjum næga orku eftir að Rússar skrúfuðu fyrir NordStream gasleiðslurnar til Evrópu. Með Scholz í för er fjölmennur hópur viðskiptamanna.

Vilja mannréttindamál í brennidepil

Heimildamanneskja Deutsche Welle úr þýsku ríkisstjórninni segir kanslarann ætla að tjá sig um stöðu mannréttindamála í ríkjunum sem hann heimsækir. Hann ætli þó að passa upp á að passa upp á að hægt verði að vinna með krónprinsinum. Prinsinn er sakaður um að hafa staðið að aftökunni á blaðamanninum Jamal Khashoggi fyrir fjórum árum. Khashoggi var myrtur á ræðisskrifstofu Sáda í Istanbúl. Samskipti á milli vesturveldanna og Sádi Arabíu stirðnuðu verulega eftir morðið, en einhver þíða virðist komin í samskiptin undanfarið. Bæði Joe Biden Bandaríkjaforseti og franski starfsbróðir hans Emmanuel Macron hafa haldið fund með krónprinsinum á árinu.

Þrýst er á Scholz úr mörgum áttum að taka hart á mannréttindamálum á meðan hann er í Miðausturlöndum. Renata Alt, formaður mannréttindanefndar þýska þingsins, segir jafn mikilvægt að ræða stöðu mannréttindamála í ríkjunum þremur og að semja um orkusölu til Þýskalands. Khalid Ibrahim, formaður mannréttindamiðstöðvar ríkja við Persaflóa, GCHR, segir kanslarann eiga að kalla eftir því að pólitískir andstæðingar verði leystir úr fangelsi í ríkjunum. Þá kalla samtök blaðamanna án landamæra, RSF, eftir því að Scholz krefji leiðtoga ríkjanna til þess að auka frelsi fjölmiðla þar.