Athugið þessi frétt er meira en 2 mánaða gömul.

Biðjast loks afsökunar vegna fimmtíu ára gamals atviks

Mynd með færslu
 Mynd: WB

Biðjast loks afsökunar vegna fimmtíu ára gamals atviks

16.08.2022 - 04:30

Höfundar

Bandaríska kvikmyndaakademían hefur beðið Sacheen Littlefeather afsökunar, næstum fimmtíu árum eftir að hróp voru gerð að henni þegar hún fyrir hönd leikarans Marlon Brando afþakkaði Óskarsverðlaun hans fyrir leik í kvikmyndinni Guðföðurnum.

Brando bað Littlefeather um að gera þetta fyrir sig í ljósi þeirrar illu útreiðar sem innfæddir Ameríkumenn hefðu mátt þola í bandarískum kvikmyndum. Littlefeather er sjálf af Apache og Yauqui-ættum. 

Heyra mátti hvort tveggja hávært baul og klapp í salnum eftir að Littlefeather lauk máli sínu. Brando samdi fyrir hana fimmtán blaðsíðna ræðu en starfsmenn hátíðarinnar vöruðu hana við að hún yrði borin af sviðinu talaði hún lengur en 45 sekúndur. 

Óréttmætar árásir og hrakyrði

Akademían sendi Littlefeather afsökunarbréf í júní en greindi frá efni þess í dag. Þar segir að þau hrakyrði og árásir sem hún mátti þola vegna yfirlýsingarinnar hafi verið óréttmæt og ástæðulaus. 

Akademían segir Littlefeather hafa sýnt aðdáunarvert hugrekki en ekki notið verðskuldaðrar virðingar fyrir.

Sömuleiðis baðst Akademían afsökunar á þeim áhrifum sem framferði gesta við hátíðina 1973 og að henni lokinni hefði haft á líðan hennar og kvikmyndaferil.

Littlefeather sagði frá því nokkru eftir atvikið að öryggisverðir hefðu haldið vestrastjörnunni John Wayne frá því að ráðast á hana. Það atvik hefur nýlega verið borið saman við kinnhestinn sem Will Smith veitti Chris Rock á Óskarsverðlaunahátíðinni í ár.

Hluti kvikmyndasafns helgaður atvikinu

Aðspurð um þann langa tíma sem leið uns afsökunarbeiðnin barst segist Littlefeather koma af löngum ættboga þolinmóðs fólks en segir stórkostlegt hve mjög viðhorfið hefur breyst á þessum fimmtíu árum.

Henni hefur verið boðið að taka til máls 17. september næstkomandi við sérstaka athöfn í nýju kvikmyndasafni í Los Angeles. Safnið var opnað fyrir tæpu ári.

Því er ætlað að sýna allar hliðar kvikmyndasögunnar, meðal annars kynþáttafordóma innan kvikmyndaiðnaðarins. Þar eru rifjaðar upp þær árásir og andúð sem Littlefeather mátti þola eftir verðlaunahátíðina 1973.

Tengdar fréttir

Menningarefni

Biður Chris Rock afsökunar

Erlent

Will Smith í tíu ára bann frá Óskarnum