Athugið þessi frétt er meira en 4 mánaða gömul.

Skipti á sérlyfjum nánast daglegt brauð

10.08.2022 - 17:04
Mynd með færslu
 Mynd: Þór Ægisson - RÚV
Barnalæknir segir skipti á sérlyfjum nánast daglegt brauð hér á landi. Sífellt sé verið að skipta um lyfjaheiti á sömu virku efnunum sem opni á hættu á að rangir skammtar eða of stórir skammtar séu gefnir.

Í speglinum í gær var fjallað um innköllun á svefnlyfinu Theralene sem Lyfjastofnun kallaði nýlega inn. Ástæðan voru misvísandi upplýsingar í fylgiseðli og á umbúðum sem hafi leitt til ofskömmtunar lyfsins. Ungt barn var nýlega lagt inn á spítala eftir að hafa fengið of stóran skammt af lyfinu.

„Þetta er nánast daglegt brauð. Það er sífellt verið að skipta um lyfjaheiti á sama virka efninu. Þá opnar það á svona hættu,“ sagði Ragnar Grímur Bjarnason, yfirlæknir á Barnaspítala Hringsins. 

Lyfjainnflytjanda beri að tilkynna Lyfjastofnun sé skortur á lyfjum en það skili sér ekki alltaf til lækna, sem sé mjög alvarlegt. 

„Þetta er því miður mjög algengt. Sérstaklega er þetta algengt með lyf eins og fyrir börn, sem eru ekki seld í stóru upplagi. Þá er þetta nánast daglegt brauð,“ segir Ragnar. Sé ákveðið lyf ekki til þurfi að skrifa upp á annað sem eigi að vera sambærilegt.

„Þetta er yfirleitt þannig að maður fær að heyra það þegar foreldrar eða apótekarinn hringir og lyfið er búið.“