Athugið þessi frétt er meira en 5 mánaða gömul.

Kortavelta ferðamanna aldrei verið meiri

Mynd með færslu
 Mynd: CC0 - Pixabay
Greiðslukortavelta erlendra ferðamanna hérlendis nam rúmum 28,3 milljörðum króna í júní. Veltan hefur ekki mælst hærri í júnímánuði frá upphafi mælinga árið 2012 og jókst um 48,6% á milli mánaða. Áður hafði kortavelta ferðamanna mælst hæst í júnímánuði 2018 en þá var hún rúmir 25,5 milljarðar.

Velta innlendra greiðslukorta erlendis hefur sömuleiðis ekki verið hærri frá upphafi mælinga árið 1997, en í maí nam hún 22,9 milljörðum króna miðað við breytilegt verðlag. Það er aukning um rúma 11,9 milljarða á milli ára.

Þetta kemur fram í mánaðarlegri úttekt Rannsóknarseturs verslunarinnar, þar sem segir jafnframt að hlutfall erlendrar veltu af heildarveltu hérlendis hafi verið 24,3% í júní. 

116,7 milljarðar króna í verslun og þjónustu

Heildarvelta í júní var um 116,7 milljarðar króna og jókst um 27,4% á milli ára miðað við breytilegt verðlag. Þar af var kortavelta Íslendinga 88,4 milljarðar og jókst um 6,45% á milli ára.

Kortavelta í netverslun innanlands nam rúmum 3,2 milljörðum króna í júní og jókst um 11,4% á milli ára. 

Velta í verslunum nam tæpum 47 milljörðum sem svipað og á sama tíma í fyrra og kortavelta í þjónustu nam rúmum 41,4 milljarði og jókst hún um 13% á milli ára.