Mynd: EPA-EFE - EFE
Athugið þessi frétt er meira en 1 mánaða gömul.
Áhafnir EasyJet og Ryanair viðhalda verkfallsaðgerðum
Áhafnir lággjaldaflugfélaganna EasyJet og Ryanair á Spáni ætla að leggja niður störf á nokkrum völdum dagsetningum í júlí. Kröfur starfsfólksins snúa bæði að launakjörum og starfsaðstöðu.
Aðgerðir starfsfólks Ryanair hófust 24. júní og Easyjet á föstudaginn var. Fimmtán flugferðum var aflýst í gær og tafir urðu á 175 til viðbótar. Stéttarfélag starfsfólks Ryanair segir vinnustöðvun fyrirhugaða dagana 12. til 15. júlí, 18. til 21. og 25. til 28. júlí.
Það nær til þeirra tíu flugvalla á Spáni sem flugfélagið notar. Áhafnir EasyJet hyggjast leggja niður störf fyrstu þrjár helgarnar í júlí.
Lidia Arasanz, talsmaður stéttarfélags áhafna Ryanair, segir engra annara kosta völ í ljósi þess að eigendur flugfélagsins hunsi kröfur um samningagerð og kjósi frekar að viðskiptavinir þess verði strandaglópar á flugvöllum Spánar.
Aðgerðir áhafna flugfélaganna tveggja hafa valdið mikilli truflun á ferðalögum og Arasanz býst við að þannig verði það í næstu lotu einnig. Verkföllin valda miklum vanda innan fluggeirans sem hefur átt í mesta basli við að ráða nýtt starfsfólk eftir að hömlum var aflétt vegna kórónuveirufaraldursins.
Sú staða er álitin helsta ástæða þess að hundruðum flugferða var aflýst til og frá Bandaríkjunum í gær og eins í innanlandsflugi en landsmenn eru á faraldsfæti í tilefni þjóðhátíðardagsins 4. júlí. Á fjórða þúsund ferða var frestað.
Tugum flugferða um Charles de Gaulle flugvöll í París hefur verið aflýst síðustu daga frá því verkfall slökkviliðsmanna hófst þar á fimmtudaginn.
